ماليزيا افغان محصلانو ته سل تحصيلي بورسونه ورکوي

 کابل/ د کب ٣مه / باختر

د لوړو زده کړو وزارت سرپرست د ماليزيا د بهرنيو چارو وزارت له حانګړي استازي احمد عظم  سره په کتنه کې د هېواد د لوړو  زده کړو  په اړه خبرې وکړې.

د باخترآژانس د خبرله مخې؛ په دې کتنه کې  په داسې حال کې چې  د دغه وزارت معينان او يو شمېر رييسان هم حاضر وو، د لوړو زده کړو وزارت سرپرست د هېواد د لوړو  زده کړو د حالت او په دې برخه کې د موجودو ستونزو په اړه خبرې وکړې او ويې ويل چې افغانستان له جګړې وروسته اوس بيا رغاونې او پرمختګ ته اړتيا لري .

هغه د ماليزيا له مرستو او همکاريو څخه مننه وکړه او د هېواد د ځوان نسل د روزنې، د استادانو د مسلکي ظرفيتونو لوړولو، محصلانو ته  د سکالرشيپونو، محصلانو ته  د آنلاين زده کړې لپاره د انترنټي اسانتياوو او د لوړو زده کړو په نورو برخو کې له ماليزيا د زياتو همکاريو غوښتنه وکړه.

دغه راز د لوړو زده کړو  وزارت سرپرست د افغان نړيوال پوهنتون جوړولو د تحقق په مقصد وړانديز وکړ چې  د ننګرهار د اسلامي پوهنتون د فعالولو په موخه يو هيئت ماليزيا ته سفر وکړي.

وروسته د ماليزيا د بهرنيو چارو وزارت ځانګړي استازي د افغانستان  د لوړو زده کړو د بنسټونو د لوست د پيل له امله خوښي څرګنده کړه او لیک لوست يې داسې يو هېواد ته چې د جګړې له امله  زيانمن شوى دى، مهم وباله.

هغه وويل: ماليزيا چمتو ده  چې په تحصيلي، بشري، روغتيايي او نورو برخو کې له افغانستان سره مرسته وکړي.

دغه راز هغه افغانستان ته د خپل سفر هدف  له افغانستان سره د مرستو د پيل په موخه د اړتياوو  او لومړيتوبونو معلومول وبلل.

په دې کتنه کې د لوړو زده کړو له وزارت سره د ماليزيا بخاري پوهنتون مسوول د سلو تحصيلي بورسونو  ورکولو ژمنه  وکړه