کابل، د وږي ۱۷مه، باختر
د افغانستان اسلامي امارت د ریاست الوزراء سیاسي مرستیال مولوي عبدالکبیر په مشرۍ له نشه يي توکو او مسکراتو سره د مبارزې عالي کمېسیون نن په سپېدار ماڼۍ کې د يوې غونډې په ترڅ کې پرانيستل شو.
ارګ د يوې خبرپاڼې په خپرولو سره ويلي چې د ریاست الوزراء سیاسي مرستیال په ياده غونډه کې وویل چې دا کمېسیون له نشه يي توکو او مسکراتو سره د مبارزې د همغږۍ او هدفمنده اقداماتو په موخه رامنځته شوی دی.
نوموړي زياته کړه، چې د اسلامي امارت له حاکمیت راوروسته په افغانستان کې د نشه يي توکو کر، تولید او قاچاق صفر ته نږدې شوی دی.
د رياست الوزراء سیاسي مرستیال زياته کړه، چې وروستیو وچکالیو، سېلابونو او نورو طبیعي پېښو د افغانستان کرنیز سیستم سخت زیانمن کړی او بېړنیو مرستو ته اړتیا لري.
هغه همدارنګه له نړيوالې ټولنې څخه وغوښتل چې د نشه يي توکو په له منځه وړلو او کروندګرو ته د بدیل کښت په برخه کې خپل مسؤلیتونه اداء کړي.
په ورته وخت کې د کورنیو چارو وزارت سرپرست خلیفه سراج الدین حقاني وویل چې د کورنیو چارو او ملي دفاع وزارتونو او نورو اړوندو ارګانونو په ګډې همغږۍ په تېرو ۳کلونو کې د نشه يي توکو پر وړاندې جدي اقدامات کړي او ګڼې لاسته راړونې لري.
نوموړي وویل، نشه یي توکي نه یواځې د افغانانو، بلکې د ټول بشریت لپاره ګواښ دی، موږ په دې برخه کې د امکاناتو او تجهیزاتو له کمښت سره مخ یوو، اړتیا ده چې نړیواله ټولنه مرسته وکړي او د افغانستان کنګل شوې شتمني ازاده او بزګرانو ته بدیل کښت برابر شي.
په همدې حال کې د ملي دفاع وزارت سرپرست مولوي محمدیعقوب مجاهد له نشه یي توکو سره د مبارزې عالي کمېسیون جوړول لوی نوښت وباله او ويې ویل چې د ملي اسلامي اردو ځواکونه له نورو اړوندو ادارو سره په بشپړې همکارۍ له نشه يي توکو سره مبارزې ته چمتو دي.
د عامې روغتیا وزارت سرپرست مولوي نورجلال جلالي وویل تر اوسه د ۱۴زره معتادینو درملنه شوې خو د بودیجې، بسترخونو، بشري قوې او د زونونو په کچه د سترو روغتیايي مرکزونو نشتون یې چارې ټکنۍ کړې او په دې برخه کې بايد له عامې روغتیا وزارت سره مرستې وشي.
د يادونې وړ ده چې د کورنیو چارو وزارت له نشه يي توکو سره د مبارزې معین لوی پاسوال ملا عبدالحق همکار په ياده غونډه کې وویل چې په تېرو درېیو کلونو کې د نشه يي توکو پر ضد ۷۸زره عملیات شوي، چې په پايله کې یې ۲۰زره تورن کسان نیول شوي، ۱۴۵۰ د بېلابېلو نشه يي توکو د تولید کارخونې له منځه وړل شوې، ۱۲۲زره روږدي کسان تر درملنې لاندې دي او ۳۷ زره هکتاره ځمکه له نشه يي توکو پاکه شوې ده.
