قندهار- سپين بولدک واټ ډېر ژر پرانستل کېږي
کابل / د چنګاښ٦ مه / باختر
قندهار- سپين بولدک واټ د پخولو کار په بشپړېدو دى او تمه کېږي چې ډېر ژر به د ترافيکو پرمخ پرانيستل شي.
دغه واټ د څه ناڅه ٨٠ کيلو مترو په اوږدوالي او ١١ مترو په سور جنوب لويديځ ولايتونه له سپين بولدک سره نښلوي.
د دې واټ لومړى برخه د ٤٠ کيلو مترو په اوږدوالي بشپړ شوى او اوس د دويمې برخې کار هم بشپړېدو ته نږدې شوى دى.
د فوايد عامي وزارت د يوې خبرپاڼې په خپرولو سره وايي د دې واټ په پخولو سربيره د سړک د غاړو، کټارې ، ويالې او همدارنګه د ترافيکي نښو درول د دغې پروژې په جوړولو کې شامل دي.
تمه کېږي دغه واټ تر راتلوونکو دريو مياشتو پورې ګټې اخيستنې ته وسپارل شي.
کارپوهان د دغه واټ جوړېدل د افغانستان – پاکستان د سوداګريزو اړيکو پراختيا او پاکستان ته د سپين بولدک له لارې له جنوب لويديځو ولايتونو څخه د کرنيزو محصولاتو لېږد ، په ټيټه بيه او په وخت سره مهم ګڼي .
\ ذ
