غوره ښوونکوته مډالونه ورکړى شول
کابل باختر دوږي دمياشتې ١ :
دکابل ، هرات، بلخ او دننګرهار دولايتونو لسو تنو غوره اوممتازو ښوونکوته پرون مډالونه ورکړى شول.
دباخترآژانس دخبرله مخې : دغه مډالونه دافغانستان داسلامي جمهوريت دجمهوررييس محمداشرف غني له حکم سره سم او دهېواد دخپلواکۍ دبيرته ترلاسه کولو د٩٦يمې کالېزې په مناسبت اودښوونکو دهڅو اوهاند په درناوي دهېواد له څلورو ولايتونو څخه لسو تنوممتازو او غوره ښوونکوته ورکړى شول.
په هغې غونډه کې چې په همدې مناسبت دپوهنې وزارت دمسوولينواو رييسانوپه ګډون جوړه شوې وه دپوهنې وزير ډاکتر اسدالله حنيف بلخي خبرې وکړې او ويې ويل چې دغه مډالونه دښوونکودلازياتې هڅونې لپاره ځانګړى ارزښت لري.
ده زياته کړه چې دپوهنې وزارت به کال په کال دښوونکو دهڅونې لپاره مډالونه او ستاين ليکونه برابر کړي او دغه راز دښوونکي دورځې لپاره هم ستاين ليکونه او مډالونه په پام کې نيول شوي دي چې مستحقوښوونکوته ورکړى شي.
