خبرونهنړۍ

غزه کې د جګړې له امله نږدې ۲۲ نیم زره وژل شوي او ۵۹ زره نور ټپیان دي

نړۍ، د مرغومې ۵ مه، بهرنۍ رسنۍ

غزه کې د صهیونست اشغالګرو او فلسطیني مقاومت جهاد اسلامي او حماس غورځنګ ترمنځ جګړه نن سه شنبې ۸۱ مې ورځې ته غځېدلې او لا هم د دغې تړانګې په بېلابېلو سیمو کې درنې نښتې او د صهیونست پوځ هوایي بریدونه روان دي.

روانه جګړه کې ټولټال ۲۲،۲۷۴ تنه وژل شوي، چې د حماس او نورو جهادي ډلو د غړو په شمول ۲۰،۶۷۴ یې غزه وال، ۳۰۳ یې د اشغالي سیمو اوسېدونکي، ۱،۱۳۹ اسرایليان او د رسمي شمېرو له مخې ۱۵۸ تنه صهیونست پوځیان په کې شامل دي.

دغه راز د غزې په روان کړکېچ کې ۵۸،۸۲۰ تنه ټپیان شوي، چې د حماس او نورو جهادي ډلو د غړو په شمول ۵۴،۵۳۶ یې غزه وال، ۳،۴۵۰ یې د اشغالي سیمو اوسېدونکي او د رسمي شمېرو له مخې ۸۳۴ تنه صهیونست پوځیان په کې شامل دي.

باید وویل شي، چې د حماس او نورو جهادي ډلو تکتیکي او پېچلو بریدونو ته په کتو، د ځینو رسنیو د راپورونو او د ځینو سرچینو د معلوماتو له مخې د صهیونست پوځ تلفات زرګونو ته رسېږي، خو اسرایلي رژیم یې له اعلانولو ډډه کوي.

د یادونې وړ ده، چې دغې جګړه کې ۷ زره فلسطينیان نادرکه، ګڼ شمېر د صهیونست پوځ له لوري اسیران او نږدې دوه میلیونه بې ځایه شوي او اوس مهال په سخت حالت کې د ژوند شپې او ورځې تېروي.

 

نور ښکاره کړئ

اړونده مقالې

بیرته پورته تڼۍ ته