کابل، د وږی ۲۰ مه، باختر
د سمنګانو د فوټبال فدراسیون مسوولینو په دغه ولایت کې د ۱۰ لوبډلو ترمنځ د فوټبال غوره لیګ پیل شویو سیالیو د پای ته رسېدو خبر ورکړی دی.
د یاد ولایت د فوټبال فدراسیون رییس تاج محمد خدا داد د باخترآژانس خبریال ته ویلي چې په دغه ولایت کې د فوټبال غوره لیګ سیالۍ د ۱۰ لوبډلو ترمنځ پیل شوې وې، چې پای لوبې ته د فېروز نخچیر او امیر علي شېر نوايي لوبډلو لار موندلې وه او لوبه د دواړو لوبډلو ترمنځ مساوي پای ته ورسېده، خو د فېروز نخچیر لوبډلې د ښې لوبې په ترسره کولو سره د یاد لیګ اتلولي خپله کړه.
نوموړي زیاته کړه، چې د فېروز نخچیر لوبډله به د مزار شریف ښار د شمال زون په غوره لیګ ګې ګډون وکړي.
ورته مهال د دایکندي د بدني روزنې او ورزش یو مسوول حسن پروېز د باختر اژانس خبریال ته ویلي چې په سنګتخت او بندر کې د « همدلي جام » تر نامه لاندې د ۱۰ لوبډلو ترمنځ د فوټبال پیل شوې سیالۍ د (استقامت دُغور) لوبډلې په بریا پای ته رسېدلي دي.
د یادونې وړ ده چې غوره لوبغاړو ته نغدي او معنوي جایزې هم ورکړل شوې دي.
