د ۱۳۱ ميليونه افغانيو په ارزښت د ځوانانو چارو معینیت او اسلاميک ريليف مؤسسې ترمنځ هوکړه لیک لاسلیک شو
کابل، د لړم ۱۷مه، باختر
د اطلاعاتو او کلتور وزارت د ځوانانو چارو معین مولوي محمد یونس راشد، د اسلامیک ریلیف مؤسسې له رئیس محمد ذوالقرنین عباس سره د ۱۳۱ ميليونه افغانيو په ارزښت هوکړه لیک لاسلیک کړی دی.
د دغه هوکړه لیک له مخې به؛ د ځوانانو د کاري فرصتونو، ظرفيت لوړونې، فکري اصلاح او اقتصادي پياوړتيا په برخو کې اووه برنامې تطبيق او د کابل، بلخ او ننګرهار ۱۸۲۵ ځوانان به ترې مستفيد شي.
د ځوانانو چارو معین، د یاد هوکړه لیک د لاسلیک کولو پر مهال ویلي چې د اطلاعاتو او کلتور وزارت به هڅې وکړي، ترڅو ځوانانو ته ښه فرصتونه او آسانتیاوي برابرې کړي.
د اسلامیک ریلیف مؤسسې رئیس هم، د ځوانانو د تعليمي، تحصيلي او کاري خدماتو په برخو کې د ځوانانو چارو معینیت هڅې ستایلې او ژمنه یې کړې چې دغه مؤسسه به ځوانانو ته ځانګړې پاملرنه وکړي.
