کابل، د تلې ۶مه، باختر
د کونړ ولایت د شیګل ولسوالۍ په موڼي سیمه کې د ۶ میلیونه افغانیو په لګښت لس بستریز روغتون پرانیستل شو.
د عامې روغتیا وزارت سرپرست مولوي نورجلال جلالي د یاد روغتون د پرانيستې په مراسمو کې ویلي، چې دغه روغتون په یوه کال کې جوړ شوی او په وړيا ډول به لس زره وګړو ته روغتیایي خدمات وړاندې کړي.
نوموړي زیاته کړه ، چې د کونړ د ۲۵۰ بستریز مرکزي روغتون پاتې چارې به هم ډېر ژر بشپړې شي، چې په پایله کې به د کونړ او نورستان ناروغانو ستونزې هوارې شي.
ورته مهال د ټکنالوجۍ او مخابراتو وزیر مولوي نجیب الله حقاني وویل: “مونږ نور د جنګ له میدانه جنازې نه پورته کوو، بلکې اسلامي نظام مو په هېواد کې حاکم دی. ولس ته غواړو په عمل کې خدمت وکړو او د امنیت ساتنه زموږ ګډه دنده ده.”
د یادونې وړ ده چې پرون هم د کونړ په پیچ درې ولسوالۍ کې د ۲۳.۵ میلیونه افغانیو په لګښت د یوه لس بستریز روغتون ودانۍ پرانیستل شوې وه.
