کابل، د زمري ۱۵مه، باختر
د امارتي ادارو د يو کلنو لاسته راوړنو د تشرېح پروګرام په دوام، د کور او ښار جوړولو وزارت چارواکو نن د دغه وزارت د تېر یوه کال مهم فعالیتونه، لاسته راوړنې او راتلونکي پلانونه له رسنیو سره شریک کړل.
د باختر آژانس خبریال د خبر له مخې؛ په همدې مناسبت د حکومت د اطلاعاتو او رسنیو په مرکز کې جوړه شوې خبري غونډه کې، د کور او ښار جوړولو وزارت سرپرست شیخ حمدالله نعماني وویل چې دغه وزارت د هېواد په ۲۹ ولایتونو کې د راستنېدونکو هېوادوالو لپاره ۴۶ چمتو ښارګوټي لري او په څلور نورو ولایتونو (بامیان، پنجشېر، خوست او غزنی) کې هم ساحې مشخصې شوې او سروې یې روانه ده.
شیخ نعماني زیاته کړه چې دغه وزارت په تېر يوه کال کې د ښاري چارو په برخه کې ۵۷ پلانونه طرحه، ترتيب او منظور کړي دي چې له دې جملې د خوست او پُل علم ښارونو ماسټر پلانونه، د لښکرګاه، غزنی، میدان ښار او اسعد آباد ښارونو عادي پلانونه او همدا رنګه د لوړ شاوليکوټ او کوز شاوليکوټ، لوړ میوند او غورک ولسوالیو تفصیلي پلانونه پکې شامل دي.
د نعماني په وینا، د هېواد په کچه د مسکن او ساختماني چارو په برخه کې پنځه پروژې پیل شوې چې له دې جملې د کابل ښار په دارالامان ساحه کې د نیلهباغ ښارګوټي د جوړولو په چارو کې ۲۵ سلنه پرمختګ شوی او پاتې چارې به یې په راتلونکو ۳۸ میاشتو کې بشپړې او ګټې اخیستنې ته به وسپارل شي.
د کور او ښار جوړولو وزارت د سرپرست د معلوماتو له مخې، د تېر کال په بهير کندهار کې یو استوګنیز ښارګوټی ګټې اخیستنې ته وسپارل شو، په هلمند کې د ۵۰۰ کورنیو لپاره د یوه استوګنیز ښارګوټي د جوړولو چارې دوام لري او په ننګرهار کې هم د ۲۰ زره کورنیو لپاره د استوګنې سروې ترسره شوې ده.
شیخ حمدالله نعماني څرګنده کړه چې په کابل ښار کې د ترافیکي ګڼې ګوڼې راکمولو په موخه، په څلورو برخو (چهار آسیاب او خاکجبار ولسوالیو، استالف او ارغندۍ) کې د بار وړونکو موټرو لپاره د ترمینل جوړولو لپاره، ټرانسپورت وزارت ته د ځمکې پر انتقال، پلان، طرحې او ساختماني ډیزاین کار روان دی.
د هغه د څرګندونو له مخې؛ په تېر يوه کال کې د هېواد په کچه د ۳۱۸۱ ښاري سرغړونو تثبیت او پېژندنه شوې او له ۴۴۳ ساختماني پروژو څخه څارنه شوې ده.
دغه راز د کور او ښار جوړولو وزارت د ښاري چارو معین شیخ مدار علي کریمي بامیاني، د دغه وزارت د ښاري پلانونو په اړه معلومات ورکړل او ویې ویل چې په تېر یوه کال کې د استوګنیزو ښارګوټو جوړولو په موخه، د ۵۶ ساحو د توپوګرافۍ سروې ترسره شوې؛ د ۳۱۵ ساحو سکېچ او کروکي شوې او د ۹۹ وانیزو پروژو براورد شوی دی.
هېره دې نه وي چې د هېواد په ۱۶ ولایتونو کې د ښارګوټو جوړولو لپاره د ۲۸ سیمو سروې، پلان جوړول او تطبیق، د کابل او نورو ولایتونو د مسکوني ساحو لپاره د ۱۲ تفصیلي پلانونو طرحه او ترتیب، د سیمه ییزو او هر اړخیزو پلانونو چمتو کول، د مسکن لپاره د ځمکې تخنیکي، اقتصادي او ټولنیز مطالعات او د لرغونو ښارونو او تاریخي آبدو ترمیم او خوندیتوب؛ د کور او ښار جوړولو وزارت د روان (۱۴۰۳) مالي کال مهم پلانونه دي.
