خبرونهTOPټولنهروغتیا

د کار او ټولنیزو چارو وزارت د کاري فرصتونو رامنځته کولو په موخه د یوه ملي بحث لپاره د کار ملي کنفرانس جوړوي

کابل، د غوايي ۱۶مه، باختر 

د کار او کارګر نړيوالې ورځې( مې لومړۍ) او د کاري خوندیتوب او روغتيا نړيوالې ورځې (د اپريل ۲۸) په تړاو ۳ اړخيزه غونډه نن په پلازمېنه کابل کې تر سره شوه.

د کار او ټولنيزو چارو وزارت معين مولوي محمد زاهد جان آغا په ياده غونډه کې وويل:«فقر او بېکاري يوه نړيواله ستونزه ده، چې افغانستان هم ورڅخه کړېږي او اسلامي امارت دغه ستونزې ته د رسېدو په موخه د کار ملي کنفرانس جوړولو تابيا نيسي، څو د يوه ملي بحث په پايله کې کاري فرصتونه رامنځته کړي.

هغه زياته کړه، چې اسلامي امارت د کارګرو حقوقو ورکړې ته ژمن دی او دوی ته د خوندي کاري چاپېريال رامنځته کولو او کاري زمېنو برابرولو هڅې کوي.

د سرچينې په خبره د کار او ټولنيزو چارو وزارت همدارنګه د کار قانون بيا کتنه ترسره او د کارموندنې ملي پاليسي چمتو کړې ده.

په ورته وخت کې په افغانستان کې د کار نړيوال سازمان رئيس ډاکټر رامين بهزاد په دغه غونډه کې وويل په دې اړه کار کوي، چې څنګه کولای شي په افغانستان کې د کارګرانو لپاره خوندي کاري چاپيريال رامنځته او کاري فرصتونه ډېر شي.

بهزاد زياته کړه، چې د خوندي کاري چاپيريال د نشتون له کبله هر کال په نړيواله کچه زرګونه کارګر خپل ژوند له لاسه ورکوي.

نوموړي همدارنګه وويل چې دمګړۍ په افغانستان کې هم ګڼ شمېر کارګران د دندو له لاسه ورکولو او خوندي کاري چاپېريال د نشتون له کبله له ننګوونو سره مخ دي.

هغه همدارنګه د کارګرو حقونو د وړکړې او کاري زمینو رامنځته کولو په برخه کې د افغانستان د کار او ټولنیزو چارو وزارت هڅې وستایلې. 

په همدې حال کې د افغانستان د صنایعو او کانونو خونې استازي اعتبار شاه شینواري وویل چې دمګړۍ په افغانستان کې ۶ زره تولیدي کارخونې شتون لري، چې ۱.۲ میلیونه کسان پکې په کار بوخت دي.

هغه له اسلامي امارت او اړوندو نړیوالو سازمانونو څخه غوښتنه وکړه، چې د صنعتي سکټور د ځان بسیاینې په موخه ورسره لا ډېره همکاري وکړي.

د یادونې وړ ده، چې په افغانستانن کې د کارګر نړیواله ورځ په داسې حال کې نمانځل کېږي، چې لا هم ګڼ افغان ځوانان د کار موندلو په موخه په غیر قانوني ډول او قاچاقي لارو بهر ملکونو ته د کار په موخه ځي، چې له ګڼو ستونزو سره لاس او ګریوان او په ځینې مواردو کې خپل ژوند له لاسه ورکوي.

نور ښکاره کړئ

اړونده مقالې

بیرته پورته تڼۍ ته
WP RSS Plugin on WordPress