د چین لپاره د افغانستان سفیر په شانګهای کې د دغه هېواد نړیوال اووم ننداتورن کې ګډون وکړ
کابل، د لړم ۱۹مه، باختر
په چین کې د افغانستان اسلامي امارت لوی سفارت د هغه هېواد په شانګهای ښار کې د چین اووم نړیوال نندارتون کې د افغان سفیر مولوي بلال کریم د ګډون خبر ورکړی دی.
یاد سفارت پر خپله اکس پاڼه لیکلي چې نوموړي په دغه نندارتون کې د ګډون پر مهال د افغان سوداګرو له غرفو څخه، چې د افغانستان د وچې میوې بېلابېل ډولونه لکه مختلف النوع بادام، د زردالو کِشته، جلغوزي، انځر د د دې ترڅنګ (زعفران، شیرین بویه، یارلنګ او نور) او همدارنګه لاسي صنایع لکه غالۍ او د قیمتي ډبرو لاجوردي مصنوعات یې په کې نندارې ته ایښودل شوي وو لیدنه کړې ده.
د سرچینې د مالوماتو له مخې افغان سوداګرو په دغه کتنه کې د اسلامي امارت له سفیر څخه چین ته د افغان صادراتي توکو د لېږد پر مهال د اسانتیاوو رامنځته کولو غوښتنه کړې.
په ورته وخت کې د چین لپاره د افغانستان سفیر د دغې کتنې پرمهال افغان سوداګرو ته د چین او افغانستان ترمنځ د سوداګریزو مسائلو په اړه مالومات ورکړي
او له خپله اړخه یې د بشپړې همکارۍ ډاډ هم ورکړی دی.
نوموړي همدارنګه د افغان سوداګرو غوښتنې، ستونزې، نظرونه او وړاندیزونه واورېدل او د حل په اړه یې د لاډېرو هڅو ډاډ ورکړ.
