کابل باختر دزمري دمياشتې ١٤ :
د افغانستان د اسلامي جمهوريت د بهرنيو چارو وزير صلاح الدين رباني نن د جنوبي او مرکزي آسيا په چاروکې دامريکا دمتحده ايالاتو دبهرنيو چارو وزارت د معاونيت له سرپرستې ميرمن الس ولز سره په کابل کې وکتل.
د بهرنيو چارو وزارت د وياند دفتر باختر آژانس ته خبر ورکړ:
د دغې کتنې په بهېرکې لومړى ميرمن ولز له افغانستان سره دوه اړخيزې همکارۍ او اړيکې د امريکا متحده ايالاتو ته ګټورې وبللې او ټينګار يې وکړ چې د افغانستان په وړاندې د دغه هېواد د پاليسۍ د بياکتنې د وخت اوږدوالى په امريکا کې اوسنۍ ادارې ته د هغې د جديت او اهميت نښه نښانه ده.
دغه راز د افغانستان د بهرنيو چارو وزير د افغانستان او امريکا ترمنځ د ستراتيژيکي مشارکت موافقه ليک او دوه اړخيز امنيتي موافقه ليک د دواړو هېوادونو ترمنځ د مناسباتو د اهميت نښه نښانه وبلله او هيله يې څرګنده کړه چې د افغانستان په وړاندې ددغه هېواد نوې پاليسۍ په نږدې راتلوونکې کې بشپړه او اعلام شي.
د دغې کتنې په دوام دواړو لورو د هېواد د سياسي او امنيتي حالاتو، د افغانستان د سولې د بهير، د افغانستان په رهبرۍ او مالکيت په دې بهيرکې د پرمختګونو او لاسته راوړنو او په دې لاره کې په همکارۍ کې د هېوادونو د رول په باب خبرې وکړې.
