د ملي امنیت سلاکار د قندهار د نوي والي د معرفۍ په غونډه کې ګډون وکړ
کابل/ د مرغومي ۱۴مه/ باختر
د افغانستان اسلامي جمهوري دولت د ملي امنیت سلاکار ډاکټر حمدالله محب د یوه لوړپوړي پلاوي په مشري نن قندهارته په سفر کې په هغه غونډه کې ګډون وکړ چې د نوي والي روح الله خانزاده د معرفت او د پخواني والي حیات الله حیات د مخه ښې لپاره جوړه شوې وه.
د ملي امنیت سلاکار په قندهار کې له سیمه ییزو مقاماتو، ولسي استازیو، د ولایتي شورا او د ځوانانو او ښځو د مدني ټولنو له غړیو او نماینده ګانو سره په کتنه کې وویل: دلته د راتګ موخه دا وه چې د جلالتمآب محترم رییس جمهور له هدایت سره سم د قندهار ولس په غوښتنه په محلي اداره او امنیتي سکتور کې بدلون راشي.
ډاکټر محب وویل، د قندهارد امنیتي وضعیت د لا ښه توب او امنیتي او دفاعي سرتېریو په لیکو کې د مثبت تغییر لپاره بشپړ امکانات چمتو دي او حکومت د نوي والي تر شا ولاړ دی.
د ملي امنیت سلاکار په خپلو خبرو کې له پخواني والي حیات الله حیات څخه مننه وکړه چې په قندهار کې یې خدمت وکړ.
