د ملي امنيت سلاکار محمدحنيف اتمر د امريکا د سفير له مرستيالې سره وکتل
کابل باختر دوري دمياشتې ١٥ نيټه :
د ملي امنيت سلاکار محمد حنيف اتمر په افغانستان کې د امريکا د سفارت
له مرستيالې ميرمن اني فورسايمر سره د دوه اړخيزو همکاريو او د پارلماني او د ولسواليو د شوراګانو د انتخاباتو د ترسره کولو په باب خبرې وکړې .
د ملي امنيت د مشاوريت مطبوعاتي دفتر باخترآژانس ته خبر ورکړ.
د ملي امنيت سلاکار د امريکا د سفارت له مرستيالې سره په کتنه کې وويل ؛ چې د امريکا متحده ايالات د افغانستان د ملت او دولت مهم تړونوال دي او زموږ ګډې ګټې په ژورو او پراخو ستراتيژيکي مناسباتو بدلې شوي دي .
محمدحنيف اتمر د خپلو خبرو په دوام ټينګار وکړ چې سوله د افغانستان د ملت او دولت حياتي اړتيا ده او امريکا تل په سيمه کې د سولي اوثبات د فضا په برابرولو کې همکاره ده او د سولې په خاطر زموږ د ملت اړتيا يې درک کړې ده .
په مقابل کې د امريکا د سفارت مرستيالې ميرمن فورسايمر دکابل او تاشکند د دويمې پروسې د کنفرانسونو د جوړيدو له امله يې د ملي امنيت سلاکار ته مبارکي وويله او له طالبانو سره د حکومت د سولې د وړانديز ملاتړ يې وکړ او زياته يې کړه چې د سولې لپاره هيله شتون لري په دې شرط چې طالبان د افغانستان اساسي قانون او د څو تېرو کلونو لاسته راوړنې ومني او له تاوتريخوالي څخه لاس واخلي .
په پاى کې ميرمن فورسايمر يو ځل بيا له افغانستان سره د مرستې په خاطر د خپل هېواد د دايمي ژمنې ډاډ ورکړ او ويې ويل ؛ چې د امريکا متحده ايالات د افغانستان د امنيتي او د فاعي ځواکونو د تمويلولو ، سمبالولو او روزنې په برخه کې ژمن دي. پاى ف ذ
