کابل باختر د ثور اوومه :
د افغانستان د اسلامي جمهوريت د ملي امنيت سلاکار محمد حنيف اتمر د جګپوړو مقاماتو د نهمې امنيتي غونډې تر څنګ دپاکستان د ملي امنيت له سلاکار جنرال ناصر جنګوعه سره وکتل .
د ملي امنيت د سلاکار دفتر باختراژانس ته خبرورکړ.
په دې کتنه کې دواړو لورو د هغو اووه ګونو پرنسيپونو په باره کې چې کابل ته د پاکستان د صدراعظم د سفر په وخت کې په هغو موافقه شوې ده هر اړخېزې خبرې وشوې .
د هېواد د ملي امنيت سلاکار محمد حنيف اتمر ټينګار وکړ چې د موافقه ليکونو او پرنسيپونو د عملي کېدو لپاره دې يو علمي پلان جوړشي څو ټول اصول په ټاکلي وخت کې عملي اړخ ځان ته غوره کړي .
د ملي امنيت سلاکار دغه راز وويل چې، د حکومتونو ترمنځ اعتماد هغه وخت رامنځته کېداى شي چې، د خبرو اترو تر څنګ عملي اقدامات وشي د پاکستان د ملي امنيت سلاکار ښاغلي ناصر جنګوعه د افغانستان د ملي امنيت د سلاکار د وړانديزونوهرکلي وکړ اوپه دې برخه کې يې ده ته دعملي ګامونو د اخېستلو ډاډ ورکړ .
هغه پرنسيپونه چې کابل ته د پاکستان د صدراعظم د سفر په وخت کې د دواړو لورو تمرنځ پرې موافقه شوې ده په لاندې ډول دي .
١_ پاکستان دې دافغانستان په رهبري او مالکيت دسولې د بهير ملاتړ وکړي .
٢ _ دواړه هېوادونه دې دجګړه مارانو او دهغو عناصرو په وړاندې چې له دغو دواړو هېوادونو څخه هر يوه ته امنيتي ګواښونه متوجه کوي اغېزمن اقدامات ترلاس لاندې ونېسي .
٣_ دواړو هېوادونه ژمنه کوي چې هېڅ يو هېواد ، شبکه ، ډله يا فرد له دغو دواړو هېوادونو څخه ديوبل په وړاندې د دولتي ضد فعاليتونو لپاره له خپلو قلمرونو څخه داستفادې اجازه ورنه کړي .
٤_ د موافقه شويو اقداماتو دعملي کېدو په مقصد دې ، دواړه هېوادونه د ارتباطي افسرانو له لارې د څېړنې ، همغږۍ او تايېد لپاره ، يو ميکانيزم جوړ کړي .
٥_ دواړه هېوادونه ژمنه کوي چې د يوبل دفضايي او ځمکني حريم له نقض څخه ډډه وکړي .
٦_ دواړه هېوادونه دې ديوبل دملامت کولو له چلند څخه ډډه وکړي اوپرځاى دې د متقابلو اندېښنو او اختلافونو د څېړنې لپاره د سولې او همغږۍ په مقصد د افغانستان _ پاکستان دعمل دپلان په چوکاټ کې د همکارۍ له ميکانېزمونو څخه استفاده وکړي .
٧_ د سولې او پيوستون او د دغو ملاتړيزو اصولو لپاره د افغانستان _ پاکستان دعمل د پلان د تطبيق په مقصد ، دواړه هېوادونه دې د سولې او پيوستون لپاره ، د افغانستان _ پاکستان د عمل دپلان له مخې کاري ډلې او لازم ميکانېزمونه جوړ کړي . ختم_ عطاالله _ اکرم
