کابل باختر د غويي د مياشتې ١٦ مه
د مشرانو جرګې د نن ورځې غونډه چې په دوو برخو کې د یادې جرګې د رئیس فضل هادي مسلم یار او لومړي نایب محمد علم ایزدیار په مشرۍ جوړه شوې وه د کورنیو چارو وزیر او د ملي امنیت لوی ریاست مرستیال په کې استجواب شول.
د مشرانو جرګې مطبوعاتي دفتر باختر اژانس ته خبر ورکړ:
د یادو مسوولانو څخه د دفاعي چارو او کورني امنیت د کمېسیون رئیس محمد هاشم الکوزي، سناتورانو او د پارلمانی خبریالانو څخه دوو تنو د رای ورکوونکو د نوم لیکنې او پيژندپاڼو د وېش مرکزونو د امنیت د ټینګښت د څرنګوالي، کابل او ولایتونو کې د وروستیو خونړیوتروریستی پیښو او فاریاب کې دیوتن جهادي قوماندان جنرال غلام فاروق قاطع د وژنې په ګډون کابل او ولایتونو کې د جنایی جرمونو د پيښو دډیر والي، د کورنیو چارو وزارت اړوند د قراردادیانو د پيسو د نه ورکړې، دې وزارت کې د ځینو بستونو د ازموینو د اخیستو د څرنګوالي، ګمارنو کې د زورواکو د لاسوهنې، د عمومی لارو د تګلورو د امنیت د ټینګښت، د جګړې په لیکو کې د سرتیرو اعشاې او اباتې ته د کمې پاملرنې، د داعش تروریستی ډلې د شتون په اړه ضدو نقیض خبرې او د هېواد شمال ته د یادې ډلې د انتقال او د دې ډلې په تړاو کابل کې استوګن د ایران سفیر ویناو څخه یادونه، د غزني، بدخشان، ارزګان، فاریاب ولایتونو او یو شمېر نورو سیمو د امنیتی ناوړه وضعیت، د خبریالانو د وژنو زیاتوالی څخه انديښنې او د دغې برخې د امنیت د ټینګښت لپاره د مناسب میکانیزم په جوړیدو ټینګار، د پولیسو د تلفاتو د زیاتوالي او ځینو نورو مسایلو اړوند پوښتنې مطرح شوې.
ورپسې د کورنیو چارو وزیر ویس احمد برمک په خپلو خبرو کې وویل چې د دې وزارت سرحدي او د عامه نظم ځواکونه د واحدې قومندې او همغمږۍ د رامنځته کیدو په موخه د ملي دفاع وزارت ته انتقال شوي دي او د پاتي تشکیل څخه شاوخوا اتلس زره تنه د رای ورکونې او پیژندپاڼو د وېش مرکزونو د امنیت په ټینګښت کې بوخت دي او د دې سربیره دم ګړۍ پولیس د هېواد د مطرحو اشخاصو او دولتی ادارو د امنیت د ټینګښت په برخو او د هېواد په ولایتونو کې په جګړه ییزو دندو بوخت دي او زیاته یې کړه چې د کابل د امنیت د ټینګښت لپاره بیلا بیل پروګرامونه ترلاس لاندې دي او هم په وروستیو ورځو کې څو تښتوونکې ډلې او ډیری مجرمان نیول شوي دي چې د شته شمېرو پر بنسټ د تیرو کلونو په پرتله د جرمونو ګراف راټیټ شوی دی.
نوموړي یو شمېر حکومتي چارواکي د غیر قانوني او تورو شیشو موټرو څخه په استفادې او د بې محصوله جنسونو په انتقال کې دخیل وګڼل او د کابل پولیسو ته د دوی له خوا د مزاحمتونو څخه یې یادونه وکړه.
د کورنیو چارو وزیر د دې وزارت د څلور کلن استراتیژیک پلان ته چې د بیلا بیلو برخو لکه د روزنیزو پروګرامونو، د پولیسو لیکو کې اصلاحات او ریفورم، د ترافیکو او زندانونو ادارو کې د اصلاحاتو رامنځ ته کول، او ښځینه پولیسو دجذب درلودونکی دی هم اشارې درلودې، او د ۱۳۹۲ څخه تر ۱۳۹۵ کلونو تر منځ د دې وزارت د قراردادیانو د ستونزو د څېړنو په موخه يې د لويې څارنوالۍ د مرستیال په مشرۍ د پلاوي د ټاکلو څخه ډاډ ورکړ چې د څیړنو د تکمیلیدو وروسته به دیادو قراردادیانو د ستونزو په حل کې لازم اقدامات ترسره شي، نوموړي د وزارت اړوند وروستۍ ټاکنې او مقررۍ د شایسته سالارۍ د اصل او د پولیسو مامورینو د ژمنې په پام کې نیولو سره وبللې او په دی وزارت کې یې د بنسټیزو اصلاحاتو څخه خبر ورکړ.
ویس احمد برمک د ښمنانو د منځه وړلو په برخه کې د وسله وال پوځ د اعلی سرقوماندان او ټولو پوځي مسؤلینو د پریکندې ارادې خبره هم وکړه، خو څرګنده یې کړه چې په ځینو حالاتو کې د نا مناسبه اراضیو شتون د پوځي عملیاتو خنډ ګرځي او په بیلابیلو ناامنو سیمو کې یې د چایڼیزو عملیاتو دلارې اچولو خبر وکړ.
دغه راز نوموړي د بیلابیلو رسنیو د بنسټونو سره د خبریالانو د امنیت د ټینګښت او د حل لارو د موندلو او ددوی د ستونزو دحلولو تیاری څرګند کړ او د هیواد د اوسیدونکو یې وغوښتل چې د پولیسو سره د جنایي او تروریستي جرایمو د راټیټیدو په برخه کې لازمه همکاري وکړی .
په پای کې، د ملي امنیت دلوی ریاست اوپراتیفي مرستیال هم د ویره اچونکو د تروریستي فعالیتونو او په ځانمرګو او چاودنیزو وروستیو بریدونو اړوند د یاد بنسټ د کړونو او تدابیرو، د افغانستان د د ښمنانو د پلانونو د کشف او شنډولو اړوند ځوابونه په سري توګه بیان کړې .
خو د غونډې په آزادو بحثونو کې یو شمېر سناتورانو د بریښنایی پیژندپانو د ویش بهیر د پیل په موخه د هېواد دولسمشرڅخه قدرداني څرګنده کړه او دغه کړنه يې یو نیک، مهم او د قانون سره سم اقدام وباله، ټینګار یې وکړ چې دغې ملی بهیر کې د چټکتیا او د هېوادوالو د آسانه لاسرسي په موخه په کابل او ولایتونو کې لا زیات معیاري مرکزونه پرانیستل شي، خو یو شمېر نورو غړو د بریښنایی پیژندپاڼو د وېش د پیل له پلوه د ملي یووالی حکومت د مشرانو تر منځ د اختلافونو څخه ناخوښي څرګنده کړه او ویې ویل چې باید د یو شمېر خلکو غوښتنې هم په دې برخه کې له پامه ونه غورځول شي، او ولسمشر او اجراايیه رئیس باید په ملی مسایلو کې په تفاهم عمل وکړي اودنظر اتفاق ولري، خو یو شمېر نورو سناتورانو دغه بهیر ختم شوی وبله او ویې ویل چې مشرانو جرګې د نفوسو د احوال د ثبت قانون په اړوند د جمهور رئیس د تقنینی فرمان د تصویب محور خپله په غاړه درلود.
همدا راز په غونډه کې یو ځل بیا په شرایطو برابرو د رای ورکوونکو د نوم لیکنې بهیر د څرنګوالي او دغې ملی بهیر کې د هېوادوالو د پراخ نه ګډون په اړه خبری وشوې او څرګنده شوه چې پلازمېنه، ولایتونو او ولسوالیو کې د نوم لیکنې لپاره د ټاکنو د خپلواک کمېسیون له خوا ټاکلشوې نیټهلنډه ده اوباید وغځول شي.
په غونډه کې د افغانستان، پاکستان او اندونیزیا د دینی عالمانو د درې اړخیزې ناستې څخه چې ټاکل شوې د راتلونکې جمعې په ورځ د اندونیزیا په پلازمېنه جاکارتا کې جوړه شي، یادونه او څرګنده شوه چې مشرانو جرګه د سولې او امنیت د ټینګښت په تړاو د دې ډول ناستو ملاتړ کوي او د دې غونډې دګډون کوونکو عالمانو څخه هیله لري چې د افغانستان دغمیزې د پای ته رسیدو لپاره خپل دیني او اخلاقي مسئولیتونه په ښه توګه ترسره کړي.
د ویره اچوونکو لخوا د سپین بولدک په ولسوالۍ کې د کندهار د امنیه قوماندان جنرال عبدالرازق په کور د برید غندل، خراسان ته د افغانستان د نوم د بدلون په موخه د ولسی جرګې د یوه غړی په څرګندونو نیوکه،دټاکنو په بهیرکې د جعلی تذکرو د استعمال څخه اندېښنې هم د نن ورځې له بحثونو څخه وو.
د یادو مواردو په جمعبندۍ کې فضل هادي مسلم یار، د بریښنايي پیژندپاڼو ویش د نفوسو د ثبت او احوالو د قانون سره سم د حکومتوالۍ یو نورمال بهیر یاد کړ او و یې ویل باید ټول نافذه قوانینو ته درناوی وشي او هر کله که څوک د یاد قانون تعدیل غواړي کولای شي د قانوني لارو اقدام وکړي او زیاته یې کړه چې تر ډېرو بحثونو وروسته، د ټولو غوښتنې د قانون په متن کې ځای پر ځای شوي دي، اوسیاسیون هم باید دهیواد دروان وضعیت او ملي ګټو ته په پام کې نیولو اقدام وکړي او دافغانستان دښمن ته دې له دې ملي بهیر څخه د ګټه اخیستنې زمینه نه برابروي. دجرګې رییس ټینګار درلود چې د یاد ملي بهیر څخه نباید ځینې خلک ناوړه او کمپایني استفاده وکړي بلکه ښه به دا وي ترڅو ټول مسایل په خبرو اترو سره حل وفصل شي.
دمشرانوجرګې رییس زیاته کړه چې د برښنایی پیژند پاڼو په اړه یو شمیر علماوو، خپل مثبت لید لوری شریک کړی چې د ستایلو وړ دی اوهم یې په خپلو خبرو کې ټینګار وکړ چې حکومت او د ټاکنو خپلواک کمیسیون باید د نوم لیکنې د مرکزونو او د رایی ورکونکو د پوهاوي د بهیر د مودې په غزولو کې لا زیاته هڅه وکړي ترڅو ټول په شرایطو برابر کسان وکولای شي په دې بهیر کې ګډون وکړي .
فضل هادي مسلم یار په داسې حال کې چې د نننۍ غونډې ځینې یاد شوي مسایل ځانګړو کمیسیونونو ته راجع کړل، په نژدې راتلونکي کې د افغانستان، پاکستان او اندونیزیا هیوادونو ترمنځ د دیني علماوو غونډې ته په اشارې سره وویل هیله مند یو چې د یادو هیوادونو دیني علما د سولې د راتګ او د جګړې د پای ته رسیدو په اړه د پام وړ پیغامونه ولري ترڅو د افغانستان نه د جګړې او بدبختۍ ټغر ټول شي .پاى_ ذکرالله
