د عامې روغتیا وزارت سرپرست په بيجينګ کې له یو روغتیايي مرکز څخه لیدنه وکړه
کابل، د لېندۍ ۱۶مه، باختر
د عامې روغتیا وزارت سرپرست مولوي نور جلال جلالي، د چين په پلازمېنې بيجينګ ښار کې له یو روغتیايي مرکز څخه لیدنه کړې ده.
د عامې روغتیا وزارت په خپره شوې خبرپاڼه کې ویل شوي چې مولوي نور جلال جلالي، چین ته د رسمي سفر پرمهال، د بیجینګ ښار د یو روغتیايي مرکز له بېلابېلو برخو څخه چې د سنتي او عصري طبابت مدغم شوي شکل خدمتونه یې لرل؛ لیدنه کړې ده.
د عامې روغتیا وزارت سرپرست، چین ته د خپل سفر په بهير کې، د دغه هېواد له یو شمېر روغتیايي مسئولینو سره کتلي او دغه راز له بېلابېلو روغتیایي مرکزونو څخه يې لیدنې ترسره کړې دي.
