کابل_باختر د چنګاښ د مياشتې٣ مه
د نېکمرغه کوچني اختر د را رسیدو په مناسبت د افغانستان د عالمانو د سراسری شوری د مبارکۍ پیغام
د افغانستان د عالمانو سراسری شوری د نیکمرغه کوچنې اختر د را رسیدو په مناسبت خپلې د زړه له کومې مبارکي د افغانستان جلالتماب جمهور رئیس، جلالتماب اجرائیه رئیس، د دولت د درې ګونو قواوو مشرانو او غړو، د افغانستان مسلمان ملت او ټول اسلامي امت ته وړاندې کوي او الله تعالی ته دعا کوي، چې د مسلمانانو روژې، تراویحو، ختمونه، صدقات او نورعبادات قبول کړي او زموږ په ګران هېواد افغانستان کې د سولې، امن او ثبات په ټینګولو سره افغان مسلمان ملت ته خوښی ور په برخه کړي.
متأسفانه د روژې په مبارکه میاشت کې د افغانستان مسلمان او مجاهد ملت د هېواد په ګوټ ګوټ کې د ځانمرګو بريدونو او چاودنو له امله یوه ورځ هم په اطمینان او آرامه فضاء کې ساه وانه خیسته، په سلګونو بېنګاه روژتي هېوادوال مو شهیدان او ټپیان او په زرګونو کورنۍ مو د غم په ټغر کېناستې، د لوی خدای (ج) له دربارڅخه هېله کوو تر څو دا ځورېدلی ملت د اختر مبارکې ورځې په امن او خوشحالۍ سره تیرې کړي.
شتمنو هېوادوالو ته پکار ده چې له بېوزلو، کونډو، یتیمانو او نورو مستحقو کسانو سره مرسته وکړي ترڅو هغوى هم د اختر په خوشحالیوکې له ځان سره شریک کړي. مسلمانان باید په دغو بختورو ورځوکې خپل خفګانونه شاته وغورځوي او یو بل ته د ورورۍ لاسونه ورکړي.#
