د شهید خلیل الرحمن حقاني تقبله الله د فاتحې مراسم په ارګ کې ترسره شول
کابل، د لېندۍ ۲۴مه، باختر
د شهید خلیل الرحمن حقاني تقبله الله د فاتحې مراسم، د افغانستان اسلامي امارت د جګپوړو چارواکو، علماءکرامو او مجاهدينو په ګډون، د ارګ په جامع جومات کې ترسره شول.
د ارګ په خبرپاڼه کې راغلي دي: د افغانستان اسلامي امارت رئیس الوزراء ملا محمد حسن آخند، اداري مرستیال مولوي عبدالسلام حنفي، د کورنیو چارو وزارت سرپرست خليفه سراج الدین حقاني، د ملي دفاع وزارت سرپرست مولوي محمد یعقوب مجاهد، د کابینې یو شمېر غړيو، ګڼو علماءکرامو او مجاهدینو نن ماسپښین د ارګ په جامع جومات کې د شهید الحاج خلیل الرحمن حقاني تقبله الله د فاتحې او دعا په مراسمو کې ګډون وکړ.
د مراسمو ګډونوالو د کډوالو او راستنېدونکو چارو وزارت د مخکېني سرپرست شهید خلیل الرحمن حقاني تقبله الله روح ته دعا او هغه ته د الله (ج) له درباره د فردوس جنت هیله کړې ده.
په پکتيا هم د شهید خلیل الرحمن حقاني تقبله الله د فاتحې مراسم ترسره شول چې د اسلامي امارت د لوړ پوړو مقاماتو او مسئولينو په ګډون، ګڼ شمېر قومي مشرانو او مخورو، مجاهدينو او عامو خلکو په کې ګډون کړی و.
