د سولې د عالي شورا وياند: د طالبانو په هر راز مخکيني شرط سره خبرو ته حاضر يو
کابل باختر دوري دمياشتې ١١ نيټه :
د سولي د عالي شورا وياند سيداحسان الله طاهري وايي ؛ دغه شورا د طالبانو په هر راز مخکيني شرط سره خبرو ته حاضره ده.
د سولي د عالي شورا وياند د باخترآژانس له خبريال سره په اړيکه کې وويل ؛ چې له شرط پرته پيشنهادي طرحه دکابل د پروسي په غونډه کې طالبانو ته وړاندې شوه خو تر اوسه پورې د طالبانو له لوري رسمي ځواب نه دى بيان شوى .
د ده د څرګندونوله مخې ؛ د حکومت پيشنهادي طرحه د طالبانو په رهبري شورا
کې تر خبرو لاندې ده او دغه شورا د طالبانو په هراز مخکيني شر ط سره چې وکولاى شي په هېواد کې سوله تامين کړي خبرو ته چمتو ده.
احسان الله طاهري زياته کړه؛ هغه طالبان چې له افغانستان څخه د بهرنيو ځواکونو وتل غواړي د خبرو ميز ته دې حاضر شي له هغه وروسته به دغه شورا له مشرانوسره په تفاهم او خبرو کې د بهرنيو ځواکونو د وتلو وخت مشخص کړي.
د ده د څرګندونو له مخې ؛ په هېواد کې د بهرنيو ځواکونو شتون د افغانستان په ثبات پورې اړه لري او په هغه صورت کې چې په هېواد کې سوله تامين شي دغه ځواکونه به شتون ونلري.
دا په داسې حال کې ده چې د امريکا د بهرنيو چارو وزارت مرستيال جان ساليوان د ملګروملتو په سازمان کې ويلي و چې بايد په يوې ګډې او غوڅې ژمنې سره طالبانو ته وښيو چې د جګړې په ډګرونو کې څه نه شي ترلاسه کولاى .
ده ټينګار کړى و د دې لپاره چې طالبان د افغانستان له دولت سره دخبرو ليوالتيا پيدا کړي بايد ددغې ډلې دتجريدولو لپاره هڅه وکړو.
د طالبانو وياند د ملګرو ملتو په سازمان کې د امريکا د سفير د مرستيال د څرګندونو په غبرګون کې ويلي و چې په افغانستان کې له زور څخه په کار اخيستلو د امريکا ټينګار ښيي چې دغه هېواد د جګړې دسختوالي په لټه کى دى او موږ هغوى له دغه هېواد څخه وتلو ته اړباسو.
خود سولې د عالي شورا غړي امين الدين مظفري د باختراژآنس له خبريال سره په خبرو کې وويل ؛ چې طالبان په افغانستان کې د بهرنيو ځواکونو شتون دسولې په لاره کې پلمه بولي.
د ده په باور هغه څه چې مهم دي د بهرنيو ځواکونو د شتون منطق دى، چې په هېواد کې د سولې ټينګښت دى او په هغه صورت کې چې سوله تامين شي د بهرنيو ځواکونو شتون خپل منطق له لاسه ورکوي. پاى ف ذ
