د سلیماني څلورم تلین؛ د کرمان پرونیو چاودنو کې ۹۵ تنه وژل شوي دي

نړۍ، د مرغومې ۱۴ مه، بهرنۍ رسنۍ

د ایراني رسنیو د راپورونو له مخې د ایران په کرمان ښار کې د پرونیو بمي چاودنو له امله چې د سپاه پاسداران د قدس څانګې د پخواني مشر قاسم سلیماني د وژل کېدو د څلورم تلین پر مهال د هغه زیارت سره نږدې شوې دي، ۹۵ تنه وژل شوي او لسګونه نور ټپیان دي.

ځینو نورو نړیوالو رسنیو بیا د وژل شویو شمېر تر سلو زیات ښودلی دی.

د نړۍ ګڼو هېوادونو د دغې پېښې له امله د ایران له حکومت او خلکو سره غمرازي ښودلې  او دا یې یو بشري جنایت بللی دی.

د دغه برید مسولیت چا په غاړه نه دی اخیستی خو د ایران د ولسمشر سیاسي مرستیال محمد جمشیدي د اېکس په یو پیغام کې ویلي، چې امریکا او د اسرایلو رژیم د دغه برید تر شا لاس لري.

جمشیدي په داسې مهال کې امریکا او اسرایل په دغه برید کې په لاس لرلو تورن کړي، چې دواړو واشنګټن او تلبیب د ایراني چارواکو دغه تورونه رد کړي دي.

ایراني چارواکو د دغه برید د سخت غچ اخیستلو خبرداری ورکړی دی.

‏9