د سترې محکمې عالي شورا غونډه وکړه
_کابل باختر دوري دمياشتې ١١ نيټه :
د سترې محکمې عالي شورا نن د سترې محکمې د ريېس قانونپوه سيديوسف حليم په مشرۍ غونډه وکړه.
د سترې محکمې د خپرونو رياست باختراژانس ته خبر ورکړ.
شورا لومړى د جنسي تېري او د ښځې پرخلاف د تاوتريخوالي د قضيو د څېړنې په وړاندې د مرکز او ولايتونو د ابتدايېه او استيناف محکمو د ١٣٩٦ کال د اجرااتو رپوټونه وڅېړل .
د رارسيدلو رپوټونوله مخې؛ په ١٣٩٦ کال کې په جنسي تېري پورې د اړوندو
قضيو په باره کې ٢٣٥ قضيې او د ښځې پرخلاف د تاوتريخوالي ٩٧٣ قضيې چې ټول تورن کسان يې ١٦٢٠ تنو ته رسېږي د ابتدايېه او استيناف محکمو له خوا څېړلې شوې دي او په نتيجه کې يې ١٤ تنه په سختو مجازاتو ، ١٧٩ تنه په دايمي بند ، ٢٢٤ تنه په اوږد بند ، ٥٤٤ تنه په منځني بند، ٥١٤تنه په لنډمهال بند او ٢٦٢ تنه په نغدي جرمونو محکوم شوي او ٢٥٣ تنو له منسوبه تورونو څخه برآت ترلاسه کړى دى .
د جنسي تېري ډيرې زياتې قضيې دکابل ، تخار ، جوزجان ، بلخ ، کندز . ، قندهار او د هرات په ولايتونو کې او دغه راز د ښځې پرخلا ف د تاوتريخوالي ډيرې زياتې قضيې دکابل ،بلخ ، دايکنډي ، هرات ، تخار، کندز، باميانو او د بدخشان په ولايتونو کې اړوندو محکموته محولې شوې دي .
څېړنې ښيي چې په ١٣٩٦ کال کې د ١٣٩٥ کال په پرتله د قضيو د څېړنې په برخه کې ٣٣٥ قضيې او د تورنو کسانو د شمېر په برخه کې ٥٤٨ تنه زيات شوي دي .
وروسته د قاضيانو د ځينو وظيفوي سرغړونوپه باب غور وشو او د قضايي پلټنې د لوى رياست د رپوټونو او د تدقيقي نظريو پربنسټ د باميانو او دايکنډي د ولايتونو د محکمو ١١ تنو قاضيانو ته د دوى د وظيفوي سرغړونو له تشخيص او تثبيت وروسته د قضايي سرغړونو د څېړنې د څرنګوالي د مقررې له حکمونوسره سم لازمې تاديبي جزاګانې تجويزې شوې.
په همدې ترتيب د بيا کتنې ٤ جزايي قضيې د لوى څارنوال د مرستيال محترم ډاکټر علامه او د هغه د همکارانو ، د محکومينو د خپلوانو او مدافعو وکيلانو په شتون د جزايي اجرااتو د قانون د ٢٨٢ مادې د حکم د شرطونو په رڼا کې تر غور لاندې ونيول شوې او په هر مورد کې لازم تصميمونه ونيول شول.
سربېره پردې د سترې محکمې عالي شورا د لوى څارنوالۍ د ادارې د غوښتنې پربنسټ د ځينو دوسيو د محکمې بدلون تايېد کړ او هم د ځينومشخصو جزايي دوسيو د څېړنې په مقصد د هېواد بېلابېلو محکموته د څېړنې واک ورکړاى شو.
پاى ف ذ
