کابل، د زمري ۲۹مه، باختر
د ریاستالوزرا اقتصادي مرستیال ملا عبدالغني برادر آخوند، نن په پکتیکا کې د پلتوني بند د چارو د پيل پرانیسته وکړه.
باختر آژانس ته د ریاستالوزرا اقتصادي معاونیت د مطبوعاتي دفتر د معلوماتو له مخې؛ په همدې موخه جوړو شویو مراسمو کې د ریاستالوزرا اقتصادي مرستیال ویلي چې اسلامي امارت دا درک کړې ده چې د پياوړي اقتصاد لپاره زراعت او د زراعت د پرمختګ لپاره اوبه تر ټولو مهمه موضوع ده.
ملا عبدالغني برادر آخوند زیاته کړې چې دې موخې ته د رسېدو لپاره اسلامي امارت د اوبو مدیریت په خپلو لومړیتونو کې نیولی او پر پانګه والو یې غږ کړی چې د اوبو مدیریت په برخه کې پانګونه وکړي.
هغه څرګنده کړې چې اسلامي امارت د هېواد د ځان بسیاینې او د ټولنیز او اقتصادي پرمختګ لپاره د نورو برخو ترڅنګ، د طبیعي سرچینو د مدیریت لپاره قوي هوډ لري او په خبره یې، په دې برخه کې یې کورنیو او بهرنیو پانګه والو ته د پانګونې زمینه برابره کړې ده.
ملا برادر آخوند ډاډ ورکړی چې اسلامي امارت د هېواد په کچه د هغو لویو او متوسطو بندونو ارزونه ترسره کړې چې کارونه یې نیمګړي یا هم نه و پیل شوي.
د هغه په وینا، د یادو بندونو د چارو بشپړولو لپاره هر اړخیز کاري پلانونه جوړ شوي چې له مخې یې د ډېرو بندونو عملي چارې پیل شوې دي. د دغو بندونو له جملې یو هم د پلتوني بند دی چې نن یې په عملي توګه کار پيل شو.
اقتصادي مرستیال همدا رنګه ویلي دي: د پکتیکا ولسونو د اسلامي نظام د راتلو لپاره ډېرې قربانۍ ورکړې دي؛ دا اوس زموږ مسئولیت دی چې د دوی ستونزو ته رسېدنه وکړو او په دغه ولایت کې هغه پروژې بشپړې کړو چې د دوی اقتصادي ستونزې تر یوې اندازې پرې حل کېدای شي. د پلتوني بند د چارو د بشپړولو په برخه کې به له شته امکاناتو څخه استفاده وکړو او له قراردادي شرکت څخه هم غواړو چې په اخلاص او امانتدارۍ سره ورسپارل شوې چارې بشپړې کړي.
د یادونې وړ ده چې پلتوني اوبو بند پروژه د اسلامي امارت په مالي ملاتړ د ملي پراختیا شرکت له لوري په دوه نیمو کلونو کې رغول کېږي چې د چارو په بشپړېدو سره به یې د پکتیکا مرکز ښرنې سربېره د نږدې سیمو تر ځمکه لاندې اوبو زېرمې قوي، کرنیزې ځمکې به خړوبې، سېلابونه به کنټرول شي او د چاپېریال په خوندي ساتلو کې به رغنده رول ولوبوي. دغه راز د دغه بند په جوړېدو سره به سلګونو هېوادوالو ته په مستقیم او غیر مستقیم ډول د کار زمینه برابره، شاوخوا ۲۵ میلیونه متره مکعب اوبه به زېرمه، ۲۵۰۰ هکټاره ځمکه به خړوبه او ورسره به ۹۳۵کیلو واټه برېښنا هم تولید شي.
