کابل باختر دکب څوارلسمه :
سعودي عربستان د افغانستان د مهاجرينو د راستنولو د چاروله وزارت سره د دوو مليونو ډالرو مرستې تفاهم ليک لاسليک کړ.
د باخترآژانس دخبر له مخې: ددغه تفاهم ليک له مخې سعودي عربـستان د افغانستان د ماليې وزارت له لارې دمهاجرينو د راستنولو دچاروله وزارت سره د دوو مليونو ډالرو مرسته کوي.
دغه تفاهم ليک دمهاجرينو د راستنولو د چارو وزير جماهير انوري، په کابل کې د سعودي عربستان سفير عبدالرحمن آل غاصب او د ماليې وزارت د خزانو رييس لاسليک کړ.
د مهاجرينو د راستنولو د چارو وزير ډاکتر جماهيرانوري ددغه تفاهم ليک له لاسليک کولو وروسته نن په يوه خبري غونډه کې وويل: په هغه وروستى سفرکې چې سعودي عربستان ته يې درلود او په هغو کتنوکې چې د دغه هيوادله مسوولو مقاماتو سره وشوې او د خادم الحرمين الشريفين له لارښوونې سره سم دغه هيواد د څه دپاسه نوي زره کورنيو د لومړنيو اړتياوو د برابرولو په خاطر د دوو مليونو امريکايي ډالرو په ارزښت مرسته کوي.
د سعودي عربستان سفيرعبدالرحمن آل غاصب د افغانستان له خلکو سره دخپل هيواد د مرستو په دوام باندې دتينګار په ترڅ کې زياته کړه: افغانستان زموږ ورور او دوست مسلمان هيواد دى او دا زموږ اسلامي دنده ده چې له خپلو افغاني ورونو سره مرسته وکړو.
ده وويل: ٢٠١٤ ميلادي کال د سعودي عربستان په مرستو باندې کومه اغيزه نه لري او په دغه کال او په راتلوونکوکلونوکې به له افغانستان سره خپلو مرستو ته دوام ورکړو.
