د دوو قومندانانو په ګډون ۱۲ طالبان په لغمان کې ووژل شول

کابل / د غبرګولي ۸ مه / باختر
د هېواد په ختیځ کې مسوولین وايي چې په لغمان کې د دوو قومندانانو په ګډون ۱۲ وسله وال طالبان وژل شوي او ۱۳ نور یې ټپیان شوي دي.
له ۲۰۱ سېلاب قول اردو څخه په خپره شوې خبرپاڼه کې ویل شوي دي چې دغه وسله وال طالبان په تېرو ۲۴ ساعتو کې د افغان ځواکونو په هوايي او ځمکنیو بریدونو کې وژل شوي دي.
سرچینه زیاتوي چې د لغمان په مرکز او الینګار او الیشنګ ولسواليو کې پيل شوي عمليات لا هم دوام لري او ګڼ شمېر سيمې د وسله والو طالبانو له شتون څخه پاکې شوې دي.
دغه راز د ننګرهار د سپين غر او اچین ولسوالیو په بېلابېلو سیمو کې ۱۱ وسله وال طالبان وژل شوي او ۱۴ نور یې ټپیان شوي دي.
وسله والو طالبانو تراوسه په دې اړه څه نه دي ویلي.
پای/وصال