کابل، د زمري ۳۰مه، باختر
د حضرت عبدالله بن مسعود د جګړه ییزو ګډو زده کړو قوماندانۍ څخه ۱۲۲۵ تنه ځوان منسوبین د عسکرانو ښوونځۍ د ۸مې دورې له پوځي بنسټیزو ۳ میاشتنیو نظري او عملي زده کړو څخه وروسته نن د یو لړ ځانګړو مراسمو په ترڅ کې فارغ شول.
دغو مراسمو کې د ملي دفاع وزارت سرپرست مولوي محمد یعقوب مجاهد، د اوبو او انرژۍ وزارت سرپرست مولوي عبداللطیف منصور او يو شمېر نورو مسوولينو هم ګډون کړی و.
د ملي دفاع وزارت سرپرست يادو فارغانو ته د مبارکۍ ترڅنګ وویل چې باید د بدني روزنې ترڅنګ فکري روزنه زده کړي او په ور سپارل شويو دندو کې هيڅ ډول غفلت ونکړي.
نوموړي همدارنګه د چارو د لا ښه والي په موخه د ياد مرکز مسوولينو ته لازمې لارښوونې هم وکړې.
د يادونې وړ ده، چې تازه فارغ شويو منسوبينو هم د هېواد په هر ګوټ کې خدمت کولو ته چمتوالی وښود او ډاډ يې ورکړ، چې ور سپارل شوي مسووليتونه به په ښه ډول ادا کړي.
