د حامد کرزي په مشرۍ د جهادي رهبرانو او سیاسي شخصیتونو غونډه جوړه شوه
کابل – باختر د مرغومي شپږمه:
د افغانستان د اسلامي جمهوریت جمهور رئیس حامد کرزي په مشرۍ د هېواد د جهادي رهبرانو او سیاسي شخصیتونو غونډې، د امریکا متحده ایالاتو ته د جمهور رئیس حامد کرزي د راتلونکي سفر او د سولې په اړه په قطر کې د طالبانو د دفتر په هکله خبرې وکړې.
د جمهوري رياست مطبوعاتي دفترباخترآژانس ته خبرورکړ:
په پیل کې د افغانستان د اسلامي جمهوریت جمهور رئیس او د امریکا د متحده ایالاتو د جمهور رئیس د راتلونکي کتنې د اجنډا ټکي د غونډې ګډونوالو ته وړاندې شول او غونډې له هر اړخیز بحث وروسته مشوره ورکړه چې د افغانستان حکومت دې د ملي حاکمیت او ملي ګټو په چوکاټ کې د امریکا له متحده ایالاتو سره دا مذاکرات ترسره کړي.
د سولې د بهیر او په قطر کې د طالبانو لپاره د دفتر په اړه، غونډې پرېکړه وکړه چې دغه بهیر دې د افغان دولت او د سولې د عالي شورا تر مشرۍ لاندې پر مخ یوړل شي.
په دې غونډه کې حضرت صبغت الله مجددي، پیر سیداحمد ګیلاني، د جمهوري ریاست مرستیالانو مارشال محمدقسیم فهیم او محمد کریم خلیلي، د ملي شورا د دواړو مجلسونو رئیسانو عبدالرؤف ابراهیمي او فضل هادي مسلمیار، پوهاند ګل الرحمن قاضی، قیام الدین کشاف، د سولې د عالي شورا رئیس صلاح الدین رباني، پوهاند نعمت الله شهرانی، محمد اسماعیل خان، سید منصور نادری او سترجنرال عبدالرحیم وردګ ګډون کړی و.
