خبرونهنړۍ

د جګړې ۹۰ ورځې/ منځني ختیځ کې د کړکېچ نوی رنګ/ د مرګ ژوبلې وروستي ارقام/ غزه کې د خلکو ژوند څنګه دی؟

نړۍ، د مرغومې ۱۴ مه، بهرنۍ رسنۍ

نن پنجشنبې غزه کې د صهیونستي رژیم د روانو ظلمونو ۹۰ مه ورځ ده او د وروستیو راپورونه په حواله دغې جګړه کې د فلسطیني شهیدانو شمېر ۲۲ زره ۳۱۳ تنو او د ټپیانو شمېر بیا ۵۷ زره ۲۹۶ تنو ته رسېدلی او دغه حالت لا هم روان دی.

د جګړې له امله وژل شویو کې ښځې، ماشومان، خبریالان، روغتیایي کارکوونکي او نور شامل دي.

دغه راز لبنان کې د حزب الله ډلې د اسرایلو وروستی برید چې په پلازمیېنې بیروت کې ترسره او د حماس غورځنګ یو لوړ پوړی چارواکی په کې ووژل شو، پر لبنان برید بللی او صهیونستي رژیم یې د سیمې هېوادونو ته د جګړې پر غځولو تورن کړی دی.

ویل کېږي د حماس له وژل شوي مشر صالح العاروري سره دغه برید کې د حزب الله ډلې یو چارواکی او نور کسان هم وژل شوي دي.

بل خوا جنوبي افریقا چې د غزې پر ملاتړ او د اسرایلو پر ضد دریځ لري، ټاکل شوې د روانې جنورۍ میاشتې پر ۱۱ مه او ۱۲ مه د عدالت په نړیواله محکمه کې د اسرایلو له لوري د نسل وژنې په تړاوو شفاهي دلیل ووایي.

د عدالت نړیواله محکمه وایي، د دغې قضیې د څېړلو پر مهال به د اسرایلو استازي هم شامل وي.

دغه راز نړیوالې رسنۍ راپورو ورکوي، چې د اسرایلو د اصلي ملاتړي هېواد امریکا د بهرینو چارو وزیر انتوني بلېنکن نن پنجشنبې غزه کې د روانې جګړې پر مهال د څلورم ځل لپاره منځني ختیځ ته د سفر اراده لري.

دغه سفر په داسې مهال ترسره کیږي، چې واشنګتن هڅه کوي سور سمندر کې د یمن د حوثي ډلې پر وړاندې د عربي هېوادونو ملګرتیا خپله کړي.

همدارنګه باید وویل شي، چې صهیونستي پوځ د غزې په بېلابېلو سیمو کې خلکو ته د خپلو مېنو د پرېښودو امر کړی او دغه راز په اشغالي او نور سیمو کې یې د فلسطیني ځوانانو نیونې هم زیاتې کړې دي.

هغه شنونکي، چې د غزې حالات له نږدې څاري، وایي، چې صهیونستي پوځ د حماس او نورو فلسطیني جهادي ډلو پر وړاندې پاتې راغلي او زور یې له بې ګناه او بې دفاع ملکي وګړو څخه باسي.

نور ښکاره کړئ

اړونده مقالې

بیرته پورته تڼۍ ته