د جمهور رييس فرمان

کابل باختر د  زمري  اته ويشتمه :

دهيواد دخپلواکۍ دبيرته ترلاسه کولو دشپږ نوي يمې کاليزې په مناسبت  دمحجوزينو او بنديانو مجازاتو  دتخفيف اوبخښنې په باب دافغانستان داسلامي جمهوريت دجمهور رييس محمد اشرف غني فرمان .

دافغانستان داساسي قانون دڅلور شپيتمې مادې په ١٨ فقره کې  دليکل شوي  حکم له مخې ، دهيواد دخپلواکۍ دبيرته  ترلاسه کولو دشپږ نوي يمې کاليزې په مناسبت  دملکي او نظامي  په ګډون دهغو محکومينو  دحجز اوبند دمجازاتو تخفيف اوبخښنه چې دممحکمو په قطعي او وروستي  حکم محکوم شوي دي په دې ډول منظورم .

دمحجوزينو  دمجازاتو تخفيف او بخښنه .

لومړۍ ماده .

١))  هغه محجوزين چې تر دوو کلونو پورې په مجازاتو محکوم شوي دي دتيرې شوې مودې په پام کې نيولو پرته دې ددوى دمجازاتو پاتې موده وبخښل شي او له حجز څخه دې ازاد شي .

٢))  هغه محجوزين  چې له دوو کلونو څخه زيات تر پنځو کلونو پورې په مجازاتو محکوم شوي دي په هغه صورت کې چې دخپلو مجازاتو دريمه برخه موده يې په حجز  کې تيره کړې وي  ددوى دمجازاتو پاتې موده دې وبخښل شي او له  حجز څخه دې ازاد شي .

٣)) هغه محجوزين  چې له پنځو کلونو څخه زيات دحجز په مجازاتو محکوم شوي دي په هغه صورت کې چې دخپلو مجازاتو نيمايي موده يې په  حجز کې تيره کړې وي  ددوى دمجازاتو پاتې برخه دې وبخښل  شي او له حجز  څخه دې ازاد شي .

٤))  ددغې مادې په ( ١) فقره کې  ليکل شوي محجوزين چې په دغه فرمان کې  دليکل  شوې بخښنې  له ښيګڼو  څخه ګټه نه اخلي ، ددوى د حجز نيمايي موده دې تخفيف شي .

٥))  هغه محجوزين چې ددغې مادې په  ( ٢او ٣)  فقرو کې په ليکل شويو کټه ګوريو کې نه شامليږي ددوى دحجز  په موده کې  دې يو نيم کال تخفيف راشي .

دعمر لوړوالى :

دويمه ماده :

هغه ښځينه  بنديانې چې څه ناڅه (٤٩)کلنۍ عمر او هغه نارينه چې د ٥٩ کلنۍ عمر يې بشپړ کړى وي او تر پنځو کلونو پورې دبند په موده محکوم شوي دي ، ددوى دمجازاتو پاتې موده دې  وبخښل  شي او له بند څخه دې ازاد شي .

دبنديانو دمجازاتو تخفيف اوبخښنه

دريمه ماده :

١_   هغه ښځينه  بنديانې چې تر دوو کلونو پورې دبند په موده او هغه نارينه بنديان چې تر يوکال پورې په بند محکوم شوي دي ، دتيرې شوې  مودې په پام کې نيولو پرته دې ددوى دمجازاتو پاتې موده وبخښل  شي او له بند څخه دې ازاد شي .

٢_ هغه ښځينه  بنديانې چې له دوو کلونو څخه زيات تر پنځوکلونو پورې  او هغه نارينه بنديان چې له يوکال  څخه زيات تر پنځوکلونو پورې په بند محکوم شوي دي ، په هغه صورت کې چې دخپل بند څلورمه برخه يې په جيل کې تيره کړې وي ، ددوى دمجازاتو پاتې موده دې وبخښل شي او له بند  څخه دې ازادشي .

٣_  هغه بنديان چې له پنځو کلونو څخه زيات تر لسو کلونو پورې په بند محکوم شوي دي په هغه صورت کې چې دخپل بند دريمه برخه يې په  جيل کې تيره کړې وي ددوى دمجازاتو پاتې موده دې وبخښل شي او له بند څخه دې ازاد شي .

٤_  هغه بنديان چې ددغې مادې په ( ١_ ٢او ٣) فقرو کې په ليکل شويو کټه ګوريو کې نه شامليږي ، ددوى دبند په پاتې موده کې دې په دې ډول تخفيف راشي .

((١))ددغې مادې په ( ١او ٢)  فقروکې دليکل شويو بنديانو په مجازات کې  ددوى دبند له څلورو برخو څخه درې برخې .

((٢)) ددغې مادې په دريمه فقره کې دليکل شويو
بنديانو په مجازاتو کې يواځې يو کال .
(٣)) له لسوکلونو څخه زيات تر پنځلسو کلونو پورې دبنديانو په مجازات کې يواځې اته مياشتې .

((٤))له پنځلسو کلونو څخه زيات دبنديانو په مجازاتو کې يواځې شپږ مياشتې .

دقطعې  دبند دمجازاتو بخښنه

څلورمه ماده .

دملي اردو او دملي پوليسو هغه افسران ، بريد ملان (  ساتنمنان )  او سرتيري او دملي امنيت دلوى رياست او دنورو نظامي تشکيلاتو لرونکو وزارتونو او ادارو منسوبين چې په اړوندو قطعاتو کې تريوکال پورې دتنفيذي  بند په مجازاتومحکوم شوي دي په هغه صورت کې چې دخپل بند دمجازاتو نيمايي موده يې په قطعه کې تيره کړې وي ددوى دمجازاتو پاتې موده دې وبخښل شي او له بند څخه دې ازاد شي .

دتخفيف  اوبخښنې دمحدوديت اوممنوعيت حالات

پنځمه ماده

١_  دغه محجوزين اوبنديان ددغه فرمان دبخښنې له ښيګڼو څخه استفاده نه شي کولاي .

١)) دجزايي  اجرااتو دقانون د ٣٠٥ مادې په ( ٢) فقره کې دليکل شويو جرمونو محکومين چې درسمي جريدې د ١٣٩٣ کال په ١١٣٢ ګڼه کې چاپ شوى دى .

٢))دشوکمارى ( قطاع الطريقي )

٣))  دوسله والې غلا دجرمونو هغه محکومين چې دجزا دقانون په ٤٥٥، ٤٥٦او ٤٥٧ مادو کې ليکل شوي دي .

٤))هغه محکومين چې په بند او حجز سربيره دمال په ردولو يا زيانمن ته دتاوان په جبيره کولو محکوم شوي دي خو داچې دمحکوم بها وجه يې ورکړى وي .

٢_ دغه محجوزين اوبنديان ددغه فرمان دتخفيف له ښيګڼو څخه استفاده نه شي کولاى :

١)) له پنځوکلونو څخه زيات تر لسو کلونو پورې دحجز يابند په مجازاتو  هغه محکومين چې ددوى مجازاتو له دريو برخو څخه دوه برخې اوياله دې څخه زياته او له لسو کلونو څخه زيات په بند هغه محکومين چې ددوى له مجازاتو څخه نيمايي يا له دې څخه زيات دتخفيف اوبخښنې دپخوانيو فرمانونو له امله تخفيف  شوى وي .

٢))داعدام په جزا هغه محکومين چې  مجازات يې په بند بدل شوي دي .

٣)) هغه محکومين چې په روان کال کې ددوى دمحکوم بها دحجزاويابندپه موده کې تخفيف راغلى وي .

٤)) دقصدي وژنې او داداري فساد دجرمونو محکومين ، خو داچې دوژنې په جرم کې دمقتول ورثه ابرا کړى وي او داداري فساد په جرمونوکې ترلاسه شوي مال يا ګټه له قانون سره سم اعاده شوي وي، ددغه فرمان په لومړي ماده او درې يمې  مادې په څلورمه فقره کې دليکل شوي تخفيف له ښيګڼو څخه ګټه اخلي .

_  زيانمن ته دمحکوم بها دوجه دورکولو په صورت کې . له ټول تخفيف څخه .

  _  زيانمن ته دمحکوم بها دوجه  دنه ورکولوپه صورت کې له نيمايي تخفيف څخه

٣_  دغه محجوزين  اوبنديان په دغه فرمان کې دليکل شوي تخفيف اوبخښنې له ښيګڼو څخه استفاده نه شي کولاي :

١)) دښځې پرخلاف دتاوتريخوالي دبندولو دقانون په ( ١٧_٢٠_٢١او ٢٢)  مادوکې دليکل شويوجرمونو محکومين .

٢)) دکورني اوبهرني امنيت پرخلاف  دجرمونو دقانون په نولسمه ماده کې دليکل شوي جرمونو له محکومينو پرته په دغه قانون کې دليکل شويو جرمونو محکومين ، په هغه صورت کې چې دمجازاتو موده له دوو کلونو څخه زياته اودجرم موضوع له شلو زرو افغانيو څخه ياپه بهرنيو اسعارو له معادل  څخه يې زياته نه وي او ددغه فرمان په پنځه ويشتمه ماده کې دليکل شويو جرمونو محکومين . 

٤_  دتروريستي جرمونو پرخلاف دمبارزې په قانون کې دلکيل شويو جرمونو محکومين .

٥_  دعسکرى دجزا دقانون په ( ١٥_١٦_١٧_١٨_١٩_٢٤_٣٤_ ٣٥او ٣٨) مادوکې دليکل شويو جرمونو محکومين چې درسمي جريدې   د ١٣٨٧ کال په ٩٤٤ ګڼه کې او دعسکرۍ دجرمونو دقانون په (١٥_١٧_ ١٨_-١٩_٢٠_٣٧_ ٣٨ او ٤١)  مادوکې دليکل شويو  جرمونو محکومين چې درسمي جريدې د ١٣٦٥ کال په ٦٠٤ ګڼه کې  چاپ شوي دي .

دحکم قطعيت

شپږمه ماده

دحکم  قطعيت دقضايه قوې دتشکيل او صلاحيت دقانون دڅلورمې مادې د (١٠) جز له مخې دمحکمې دحکم دصادريدو له نيټې څخه اعبار لري .

دحق العبدي ددعوا اقامه

اوومه ماده :

ددغه فرمان دحکمونو تطبيق ، داشخاصو دحق العبدي دعوا داقامه کولو خنډ نه کيږي .

دښځينه محجوزينو اوبنديانو تسليمي .

اتمه ماده

١_  دجيلونو ادارې او دماشومانو داصلاح اوروزنې مرکزونه مکلف دي  هغه محجوزين  ( نارينه اوښځې )  او هغه ښځينه بنديانې چې ددغه فرمان له حکمونو سره سم له حجز يا بند څخه ازاديږي له احوالو سره سم  دهغوى ميندو او پلرونو يا قانوني ممثل يا شرعي محارمو ته تسليم کړي .

٢_  دکار ټولنيزو چارو ، شهيدانو او دمعلولينو وزارت مکلف دى هغو محجوزينو ته چې ميندې او پلرونه ، قانوني ممثل يا شرعي  محارم ونه لري په مرکز او ولايتونوکې داستوګنې مناسب ځاى تدارک کړي .

٣_  دښځو دچارو وزارت مکلف دى هغو ښځينه  بنديانو ته چې ددغه فرمان له حکمونوسره سم له بند  څخه   ازاديږي  ددوى په خوښه د دوى دشرعي محرم تر پيداکيدو پورې په مرکز او ولايتونوکې داستوګنې مناسب ځاى تدارک کړي .

دبخښني او تخفيف  په شرايطو  دبرابرو کسانو دلست برابرول .

نهمه ماده :

اړونده مرجع موظف دى چې  په دغه فرمان کې دليکل شوې بخښنې او تخفيف  په شرايطو دبرابرو استفاده کوونکو لست برابر کړي او دمنظورۍ  لپاره يې دافغانستان داسلامي جمهوريت دجمهوري رياست عالي مقام ته وړاندې کړي .

تطبيقوونکې مرجع

لسمه ماده :

ددغه فرمان دحکمونو دعملي کولو په مقصد  په دې ترکيب په هر ولايت کې يو کميسيون جوړيږي .

١_ دازادۍ دسلب څارنوال درييس په توګه

٢_   دملي امنيت دلوى رياست استازي دغړي په توګه

٣_  دبنديانو په برخه کې دجيل آمر دغړي په توګه

٤_  دمحجوزينو په برخه کې دماشومانو داصلاح او روزنيز دمرکز آمر دغړي په توګه

٥_  دملي اردو دبنديانو په برخه کې دملي دفاع وزارت استازي دغړي په توګه

٦_  دښځينه محجوزينو او بنديانو په برخه کې دښځو دچارو وزارت استازي
. دغړي په توګه
٧_  دافغانستان دبشر دحقوقو دخپلواک کميسيون استازى  دغړي په توګه

درپوټ وړاندې کول

يوولسمه ماده

١_  ددغه فرمان په نهمه ماده کې ليکل شوي  کميسيون مکلف دى چې د جنسيت په تفکيک  استفاده کوونکو دټول شمير دمحکومينو دکټه ګوري  ( محجوزينو اوبنديانو  )  او داجرااتو دبشپړولو دنيټې په ګډون خپل کاري رپوټ دکورنيو چارو وزارت او دجمهوري رياست  دچارو دادارې لوى رياست ته وړاندې کړي .

٢_  دسترې محکمې دقطعي او وروستيو حکمونو پرتطبيق  دڅارنې  رياست دې په سمه او دقيقه توګه اويوشان  ددغه فرمان دحکمونو دعملي کولو بهير په جدي توګه وڅاري .

انفاذ:

دولسمه ماده :

دغه فرمان د ١٣٩٤ کال دزمري دمياشتې له اته ويشتمې نيټې څخه نافذ دى  او په هغه کې ليکل شوي حکمونه  په هغو محجوزينو او بنديانو تطبيقيږي چې ددغې نيټې تررارسيدو پورې دمحکمو قطعي او وروستى حکم دهغوى پرخلاف  صادريږي .