کابل، د وږي ۱۵مه، باختر
د افغانستان د بهرنیو چارو وزارت د قرغزستان حکومت له لوري د دغه هېواد د ممنوعه ډلو له نوملړ څخه د اسلامي امارت د نوم اېستل کېدو تود هرکلی وکړ.
د یاد وزارت ویاند عبدالقهار بلخي د یوې خبرپاڼې په خپرولو سره ویلي چې د بهرنیو چارو وزارت د قرغزستان جمهوريت له لوري د طالبانو غورځنګ، چې پخوا د افغانستان اسلامي امارت ته نسبت ورکول کېده د ممنوعه ډلو له نوملړ څخه لرې کول د ستاينې وړ ګام بولي او هرکلی یې کوي.
په خبرپاڼه کې زیاته شوې، چې د نورو هېوادونو په تسلسل د قرغزستان دا ګام په سیمه او نړۍ کې د افغانستان اسلامي امارت په تړاو د سياسي درک د رامنځته کېدو ښکارندوی دی او د اسلامي امارت او نورو هېوادونو ترمنځ د دوه اړخیزو اړیکو د لا پیاوړتيا په لار کې د خنډ د لرې کېدو په مانا دي.
دا په داسې حال کې ده، چې د روسیې هېواد له تور نوملړ څخه د اسلامي امارت د اېستل کېدو طرحه هم د هغه هېواد ولسمشر پوتین ته رسېدلې او ویل کېږي، چې دغه هېواد به ژر اسلامي امارت له خپل تور نوملړ څخه وباسي.
