کابل/ د وږي١٢مه / باختر
له نورو هېوادونو سره د افغانستان سوداګري مخ په زياتېدو ده.
هره ورځ په سوداګريزو توکو بار سلګونو لارې د افغانستان په پولو تک راتک کوي چې زياتره يې افغانستان ته واردېږي.
په تېرو٢٤ ساعتونو کې په سلګونو سوداګريز کاروانونه د تورخم له لارې افغانستان ته داخل شوي او برعکس له افغانستان څخه پاکستان ته انتقال شوي دي.
دغه راز ويل کېږي چې د افغانستان او ازبکستان ترمنځ د اور ګاډي په واسطه د حيرتانو بندر له لارې د توکو د لېږدولو بهير مخ په زياتېدو دى.
چارواکي وايي د اسلام قلعه او ابونصر فراهي بندرونو له لارې د سوداګريزو توکو تجارت هم مخ په زياتېدو دى.
افغانستان د لوړمصرف کوونکي هېواد په توګه خپل زياتره توکي په ځانګړي توګه خوراکي اوساختماني توکي له نورو هېوادونو لکه پاکستان، ايران، قزاقستان او ازبکستان څخه واردوي.
د افغانستان د سوداګرۍ او پانګوني خونې مرستيال يونس مومند باختراژانس ته وويل چې ټولې لارې د وارداتو او صادراتو لپاره پرانستي دي او سوداګر کولاى شي خپل کار بېرته له سره پيل کړي.
د اسلامي امارت په راتګ سره په لويو لارو کې دغيرقانوني پيسو اخيستل له منځه وړل شوي او دا د دې لامل شوي چې سوداګر د وارداتو او صادراتو لپاره لږ پيسې ورکړي. خو په افغانستان او پاکستان کې د سوداګريزو کاروانونو ورو بهير د سوداګرو لپاره يوه ننګونه پاتې ده.
د افغانستان د سوداګرۍ اوصنايعو خونه وايي چې په دواړو خواو کې د سکينرونو د نشتوالي له امله يوازې دوه لارې موترونه چې سوداګريز توکي لېږدوي په يوه ساعت کې له بند رڅخه تېر شي.
دغه راز د صنعت او سوداګرۍ وزارت چارواکي وايي هڅې روانې دي چې د افغانستان او نورو هيوادونو ترمنځ سوداګريزو ستونزو ته د حل لاره پيدا شي کړي.
\ ذ
