د اطلاعاتو او کلتور وزارت له کارکوونکو څخه د «عقیدتي مسایلو» د آزموینې پایلې اعلان شوې
کابل، د لړم ۱۳مه، باختر
د اطلاعاتو او کلتور وزارت د دعوت او ارشاد ریاست له لوري، د دغه وزارت د بېلابېلو برخو له سلګونو کارکوونکو څخه د ۱۴۰۳ مالي کال د «عقیدتي مسایلو» د درسي نصاب د څلورنیم میاشتنۍ آزموینې پایلې نن اعلان شوې.
د باختر آژانس د خبر له مخې؛ په همدې مناسبت جوړه شوې غونډه کې، د اطلاعاتو او کلتور وزارت د ځوانانو چارو معین مولوي محمد یونس راشد، په اسلامي ټولنه کې د دعوت او ارشاد پر اړتیا او د علماء کرامو پر مقام هر اړخیزې خبرې وکړې او ویې ویل چې دیني عالمان د انسانانو د معنویت او د ابدي ژوند د اصلاح مسئولیت پر غاړه لري او د احترام وړ کسان دي.
هغه زیاته کړه چې انسان د دنیوي (مادي) او اخروي (معنوي) اسبابو لپاره ژوند کوي؛ خو د انسانانو د ژوند اصلي او اساسي موخه باید خاص د الله تعالی (ج) د رضایت حاصلول او خلکو ته خدمت کول وي.
دغه راز د اطلاعاتو او کلتور وزارت د دعوت او ارشاد رئیس مولوي حاجي محمد طیب، د دنیوي او اخروي آزموینو په اړه هر اړخیز معلومات ورکړل او ویې ویل چې انسان د آخرت په ستر امتحان کې د کامیابۍ او د الله تعالی (ج) د رضایت د ترلاسه کولو لپاره باید ډېر عبادت وکړي او د اسلامي شریعت مطابق خپل اعمال ترسره کړي.
هغه له خلکو څخه وغوښتل چې د اخروي امتحان لپاره ځانونه چمتو کړي؛ د جهنم له اور څخه د خپلو کورنیو او قریبانو د ژغورلو لپاره دې هڅې وکړي او دوی هغو کارونو ته وهڅوي چې د الله (ج) د رضایت سبب کېږي او له هغه څه یې منع کړي چې د الله تعالی (ج) د نارضایتي سبب ګرځي.
د دعوت او ارشاد رئیس، همدا رنګه پر ټولو کورنیو غږ وکړ چې خپل اولادونه د دیني علومو په جوهر سمبال او د فکري روزنې لپاره یې هڅې وکړي او ترڅنګ یې عصري علوم هم پرې زده کړي.
په ورته مهال، د ځوانانو چارو معینیت د فرهنګي چارو رئیس مولوي امداد الله منصور وویل: «د تاریخ په اوږدو کې چې هر وخت پر افغانستان باندې استعماري قوتونو یرغل کړی دی؛ د افغانانو په ځانګړې توګه د ځوانانو پر افکارو او اذهانو کار کړی او د هغوی لپاره یې بهرنۍ نسخه جوړه کړې او تطبیق کړی یې ده».
خو په وینا یې، په اسلام مینو افغانانو هېڅکله په هېواد کې پردي افکارو ته وخت او ځای نه دی ورکړی او د دښمن د دغه شان شومو موخه پر وړاندې په ټول قوت سره درېدلي او د هغوی شوم پلانونه یې شنډ کړي دي.
د غونډې په بهیر کې د اطلاعاتو او کلتور وزارت د کاپي رايټ آمر مولوي عبدالحق حماد، وویل چې هر انسان باید د خپل ژوند لپاره اهداف ولري او د خپلو اهدافو د ترلاسه کولو لپاره باید له ټولو شته امکاناتو څخه ګټه واخلي.
د هغه په وینا، د انسان اصلي او اساسي هدف باید د الله تعالی (ج) د رضایت حاصلول، د بشر لپاره خدمت کول او پر ځمکه باندې الله (ج) د نظام حاکمول وي.
د آزموینې یو شمېر ګډونوالو هم، پر دیني او عقیدتي مسایلو د پوهاوي لپاره، د دعوت او ارشاد ریاست د روزنیزو پروګرامونو جوړول مهم او اغېزناک وبلل او د دوام غوښتنه یې وکړه.
هغوی دیني زده کړې، د ټولنې د اصلاح او د ژوندانه تر ټولو مهمه برخه وبلله او ویې ویل چې د دعوت او ارشاد ریاست په روزنیزو دورو کې یې، د دیني او عقیدتي مسایلو په اړه ډېر معلومات ترلاسه کړي دي.
د غونډې په وروستۍ برخه کې، د مسئولینو له لوري د آزموینې پر یو شمېر ممتازو ګډونوالو ته ډالۍ هم ورکړل شوې.
