کابل – باختر دکب دمياشتې ١١
د ولايتونو داطلاعاتو او فرهنګ د رييسانو درپوټ ورکولو دريمې غونډې نن
د اطلاعاتو او فرهنګ وزارت دمعين پوهنمل نبي فراهي په وينا سره په خپل کار
پيل وکړ.
دباختر آژانس دخبريال دخبرله مخې : د اطلاعاتو او فرهنګ وزارت د کاري بهير دښه والي او درپوټ ورکولو د نظام دپياوړتيا په خاطر چې په مسلمه توګه دسالمې او حساب ورکوونکې ادارې جوړول دې دغې موضوع ته پاملرنه کړې ده او د ولايتونو داطلاعاتو او فرهنګ درييسانو درپوټ ورکولو غونډه يې جوړه کړه.
دا دريمه غونډه ده چې په دې لاره کې جوړيږي .
لومړى د اطلاعاتو او فرهنګ وزارت د بشرى منابعو رييس روح الامين حبيبي دښه راغلاست د ويلو په ترڅ کې د رپوټ ورکولو د غونډې د جوړولو هدف د ښو اجرااتو ترسره کول ، دمرکز او دولايتونو درييسانو ترمنځ همغږۍ ، ددغو رياستونو ترمنځ د تجربو تبادله او په سمه توګه د پروګرامونو جوړول او رپوټ ورکول وبلل.
وروسته پوهنمل نبي فراهي په خپلو خبروکې د دغه شان غونډو جوړول د اړوندو چارو په ښه والي کې ګټور وبلل او ويې ويل چې دغه غونډه به ټيک هغه وخت په زړه پورې نتيجې ولري چې د اطلاعاتو او فرهنګ رييسان دحقايقو پربنسټ رپوټ ورکړى او په ستونزو برياليتوبونو او په پياوړو او کمزورو ټکو ډ ډه ولګوي . پوهنمل فراهى د اطلاعاتو او فرهنګ له رييسانو څخه وغوښتل چې د فرهنګي ميراثونو دساتنې په برخه کې دافغانستان په خلکو پورې محدودې وياړنې نه دي ، پاملرنه وکړي او د اړوندو ولايتونو دشاعرانو ،ليکوالو او د فرهنګي او ادبي شخصيتونو په درناوي کې هڅه او هاند وکړي .
ده داطلاعاتو او فرهنګ رييسانو ته دنده وسپارله چې دکتاب لوستلو فرهنګ پياوړى کړي او د سيمه ييزې اصيلې موسيقۍ په ژوندي ساتلو کې هڅه او هاند وکړى .
فراهي دګرځندوى د دوو انسټيټونو دجوړولو يادونه هم وکړه او ويې ويل : په دغو مرکزونو کې ځوانان روزل کيږي چې له ګرځندويانو سره مرسته وکړي.
وروسته د ولايتونو د اطلاعاتو او فرهنګ يو شمير رييسانو د روان کال کاري رپوټونه او د راتلونکى کال پلانونه بيان کړل او د اړوندو ريا ستونو دکاري ستونزو د لرې کولو غوښتنه يې وکړه .
دغه سيمينار د دريو ورځو لپاره دوام کوي.
