‏د اسلامي همکارۍ سازمان د بهرنيو چارو وزيرانو ۵۰مې غونډې ته د افغانستان اسلامي امارت د بهرنیو چارو وزارت د سرپرست مولوي امير خان متقي د وينا متن

کابل، د وږي ۹مه، باختر
الحمد لله رب العالمین والصلاة و السلام علی خیر خلقه محمد وعلی آله واصحابه اجمعین.
اما بعد:
جلالتماب حسين ابراهيم طه – د اسلامي همکارۍ سازمان سرمنشي، ښاغلی مبيلا مبيلا د کېمرون جمهوریت د بهرنیو چارو وزیر، د اسلامي همکارۍ سازمان د غړيو هېوادونو د بهرنيو چارو محترمو وزيرانو او استازو او د ناظرو هېوادونو او سازمانونو درنو استازو!
السلام عليکم ورحمت الله وبرکاته!
تر هر څه وړاندې د افغانستان اسلامي امارت او خلکو په استازیتوب د کېمرون جمهوريت له حکومت او خلکو څخه د اسلامي همکارۍ سازمان د بهرنيو چارو وزيرانو د پنځوسمې غونډې د کوربه توب او مېلمه پالنې له کبله د زړه له تله مننه کوم. همدا راز د اسلامي همکارۍ سازمان د يو له بنسټ ايښودونکي هېواد د استازي په توګه د دغه سازمان له سر مُنشي جلالتمآب حسين ابراهيم طه څخه د دغه سازمان د حکيمانه رهبرۍ او د دغې غونډې د بريالي تدوير له کبله د زړه له تله مننه کوم.
ښاغلو او آغلو!
خوښ يم چې د اسلامي همکارۍ سازمان د بهرنیو چارو وزيرانو په غونډه کې په داسې حال کې د خپل هېواد افغانستان په استازيتوب ګډون کوم چې له لسيزو وروسته اوس په‌کې نه بهرنی عسکر شته او نه داخلي جنګ. له افغانستان څخه د لوېديځ د نظامي او فکري اشغال لمن په بشپړه توګه ټوله شوې. په هېواد کې د قدرت جزيرې له منځه وړل شوې او ټوله خاوره د يوه مرکزي، متعهد او مسئول حکومت په لاس کې ده.
افغانستان څو لسيزې وروسته له بشپړ امنيت او ثبات برخمن دی؛ په دولتي ادارو کې فساد له منځه تللی؛ د هر ډول مخدره موادو کرنه او سوداګري په مطلق ډوله بنده شوې. د هېواد او خلکو د لومړيتوبونو د تحقق او د متوازن پرمختګ لپاره د هېواد له ګوټ ګوټ څخه عوايد مرکزي خزانې ته راټوليږي او د افغانستان ملي بودجه سل په سلو کې له کورنیو عوايدو تمويليږي. افغانستان اوس د يوه داسې امنيتي ځواک څښتن دی چې د هېواد د ازادۍ او ثبات ګټندوی او ساتندوی دی او د خپل هېواد د ثبات له لارې د سيمې په ثبات کې خپل رغنده نقش لوبوي. مګر لسيزو جګړو ځپلی افغانستان ستونزې هم لري. د افغانستان بانک ميلياردونه ډالر شتمني د امريکا د متحدو ايالتونو له خوا کنګل شوې؛ پر افغانستان غيرعادلانه اقتصادي بنديزونه لګيدلي؛ په غیر منصفانه ډول د رسمیت مشروع حق ور‌ څخه اخيستل شوی او آن په نړيوالو تخصصي سازمانونو کې ترې د استازيتوب غيرقابل انکار حق اخيستل شوی او په دې سربېره د يوې منظمې تبليغاتي جګړې هدف او د يواړخيزو مغرضو راپورونو موضوع ګرځول شوی دی.
په داسې حال کې چې د افغانستان اسلامي امارت د ستونزو د هواري لپاره شپه او ورځ کار کوي او په دې برخه کې يې پام وړ لاسته راوړنې هم لرلي؛ د اسلامي همکارۍ سازمان له غړيو هېوادونو او د نړۍ له ټولو بشرپالو هېوادونو څخه دوه غوښتنې لري:

زموږ لومړۍ غوښتنه دا ده چې ټول هېوادونه بايد د افغانستان د مرکزي بانک د ټولو شتمنيو د آزادولو او له افغانستان څخه د اقتصادي او د افغانستان اسلامي امارت له مشرانو څخه د سفري بنديزونو د لرې کولو لپاره جدي هڅې وکړي. دغه بندیزونه د افغانستان د مرکزي بانک د وظايفو د معطل کېدلو، د افغانستان د اقتصادي ودې او آن سيمه ييزې سوداګرۍ د ورو کېدو او د دوه اړخيزو او څواړخيزو اړيکو د ټينګولو په موخه د راشه درشه د مخې ډب کولو سبب شوي. زموږ هيله ده چې د جګړې د وخت چلند د سولې پړاو ته را و نه لېږدول شي. آيا دا منطقي ده چې يو کوربه هېواد دې د يوه هېواد د بهرنیو چارو وزير د بلنې له کبله له ملګرو ملتونو څخه اجازې اخيستنې ته اړ شي؟ آيا دغه ډول چلند په زوره د واکمن نړيوال نظم د عادلانه توب تر پوښتنې لاندې راوستل نه دي؟
زموږ دويمه غوښتنه دا ده چې د اسلامي همکارۍ سازمان غړي هېوادونه او د نړۍ نور هېوادونه د مشترکو مشروع ګټو په چوکاټ کې له افغانستان سره اقتصادي او سوداګريزې ملګرتيا ته داخل شي.‌ افغانستان د ستراتيژيک موقعيت، پراخو طبيعي زېرمو او ارزانه او خواريکښ بشري ځواک په لرلو سره د ډاډمن امنيت، اقتصاد محوره او متوازنې بهرنۍ تګلارې او مخلصانه سياسي هوډ په سيوري کې د سيمه ييز اتصال او پانګونې  بې مثاله فُرصت دی.‌ دا فُرصت زموږ له ملي حاکميت او مشروع ګټو پرته هېڅ حدود نه لري.
‏درنو حاضرينو!
افغانستان له لسيزو جګړې راوتلي هېواد په توګه د ماضي د ترخو تجربو د هېرولو او د نړۍ له هېوادونو سره د دوه اړخيزو مشروع ګټو پر اساس د نويو اړيکو پيلولو مخلصانه عزم لري. موږ د ځان او نړۍ دواړو لپاره د امن پيغام لرو او د سيمې او نړۍ هېوادونو ته بشپړ ډاډ ور کوو چې زموږ خاوره به د هېچا په خلاف نه کاريږي. دا ژمنه موږ په تېرو درېو کلونو کې په عمل کې ثابته کړې ده. په ورته ډول، د نړۍ له هېوادونو څخه هم له افغانستان سره د بالمثل تعامل غوښتنه کوو او د يو اړخيزو ګمانونو او د پخوانيو ناکامو تجربو پر اساس ولاړو تحليلونو پر ځای يې د نويو واقعيتونو پر اساس ولاړ تفاهم ته رابولو.
افغانستان د اسلامي همکارۍ سازمان د ټولو غړيو هېوادونو ترڅنګ د نړۍ ټولو هېوادونو ته په مثبت نظر ګوري او له هغوی څخه هم د مثبت تعامل غوښتنه لري.
درنو حاضرينو!
ستره بې انصافي به وي چې د اسلامي نړۍ د بهرنیو چارو وزيرانو په دې ناستې کې د فلسطين قضيې ته چې د اسلامي همکارۍ سازمان وجودي فلسفه جوړوي، اشاره و نه کړم. له تېرې يوې پېړۍ راهيسې چې د فلسطين د بشر او حجر د له منځه وړلو لپاره کومه جګړه کېږي او په ځانګړې توګه له تېر نږدې يوه کال راهيسې چې په کوم سرعت د اشغالګر صهیونستي رژيم له‌خوا د فلسطين د مظلومو خلکو کومه ارادي، منظمه، او بې‌رحمانه نسل وژنه روانه ده، په تاريخ کې ساری نه لري. مګر له يوه کال تېرېدو سره سره، واکمن نړيوال نظم نه يوازې د ظالم د لاس په نيولو کې پاتې راغلی، بلکې د مظلوم پر ضد يې مالي، نظامي او تبليغاتي ملاتړ کېږي. دا حالت په هېڅ ډول د توجيه وړ نه دی. دا د نړۍ د ټولو بشرپالو هېوادونو، په ځانګړې توګه د اسلامي همکارۍ سازمان مسئوليت دی چې د فلسطين قضيې ته عاجل، عادلانه او دايمي حل پيدا کړي او د دغه حل د تطبيق لپاره هر ډول اړينه سياسي اراده، همغږي، او امکانات پيدا کړي. که موږ د اسلامي همکارۍ سازمان غړي هېوادونه دا قضيه هواره نه کړو، نه به مو خدای وبخښي او نه خپل ولسونه.
له توجه نه مو يوه نړۍ مننه!
والسلام علیکم ورحمة‌الله و برکاته