د اسلامي امارت او ملګرو ملتونو د ادارو تر منځ د همغږۍ د لوړې کچې څلورمه ناسته نن په کابل کې ترسره شوه

کابل، د مرغومي ۲۶مه، باختر

د افغانستان پلازمېنه کابل ښار نن د اسلامي امارت او ملګرو ملتونو ادارو تر منځ د همغږۍ د لوړې کچې د څلورمې ناستې کوربه وو.

دغه ناسته، چې د بهرنیو چارو په وزرات کې ترسره شوه، د امارتي چارواکو ترڅنګ په کې په افغانستان کې د بېلا بېلو نړیوالو ادارو استازو هم پکې برخه اخیستې وه.

د بهرنيو چارو وزارت سرپرست مولوي امير خان متقي په دغه ناسته کې ویلي؛ اوس د دې وخت رارسېدلی چې ټولې هڅې د هېواد پر رغونې او پرمختګ متمرکزې شي او د افغانستان اسلامي امارت په خپل ټول توان هڅه کوي، چې هېواد بېرته پر خپلو پښو ودرېږي او په بشري او پرمختيايي ډګرونو کې ځان بساينې ته ورسېږي.

هغه زیاته کړه، چې اسلامي امارت د هېواد اقتصادي ودې ته ژمن دی او په همدې موخه په دغو نږدې وختونو کې د صنعتي پارکونو له پاره ۳۲ زره هکتاره ځمکه ځانګړې شوې، ډېر کوچني کاروبارونه له ماليې څخه بېخي معاف شوي او په عموم کې د ماليې اندازه د پخوا په پرتله د پام وړ را ټيټه شوې ده.

ښاغلي متقي همدارنګه وویل؛ د دې له پاره چې له نړيوالو مرستو څخه اعظمي ګټه واخیستل شي، په کار ده؛ چې د مرستو وېش د افغانستان د خلکو له اړتياوو او لومړيتوبونو سره عيار شي او په دې برخه کې روانه همغږي نوره هم پياوړې شي.

نوموړي له مرستندویه بنسټونو څخه غوښتنه وکړه، چې له اسلامي امارت سره له ګاونډيو هېوادونو د راستنېدونکو هېوادوالو د دايمي مېشېدنې، کروندګرو ته د نشه یی توکو بديل معيشت برابرولو، د اقليمي بدلون په برخه کې نړيوالو مالي صندوقونو ته د افغانستان د لاسرسي او په اړوندو فورمونو کې د افغانستان استازيتوب د يقيني کولو، د روغتيايي سکتور د ملاتړ، په ځانګړې توګه د سرطان د درملنې د ملي مرکز تجهيز او د افغانستان له لومړيتوبونو سره سم د ماين پاکۍ برخې ته توجه کولو په برخه کې مرستې وکړي.

د یادونې وړ ده، چې مولوي امیرخان متقي د اسلامي امارت په استازيتوب د ټولو همکارو ادارو سره د ګډ کار او همکارۍ ډاډ ورکړ او غوښتنه یې وکړه، چې هڅه دې وشي چې د مرستو ډول له بشري څخه نيمه پراختیايي او پرمختيايي مرستو لور ته تغير وکړي، ځکه چې بشري مرستې يوازې د عاجلو حالاتو اړتيا وي او اوږدمهالې اړتياوې له منځه نه شي وړلی.

نور ښکاره کړئ

اړونده مقالې

بیرته پورته تڼۍ ته