حکمت خليل کرزى : د تروريزم له منځه وړل د نړيوالې ټولنې د جدي همکارۍ غوښتنه کوي .

کابل باختر د ثورپنځلسمه :
د بهرنيو چارو وزارت سياسي معين  حکمت خليل کرزي پرون دتروريزم پرخلاف  د مبارزې او د تاوتريخوالي د رامنځته کوونکې  بنسټپالنې د مخنيوي په کنفرانس کې  چې د تاجکستان جمهوريت ، داروپا اتحاديې او د اروپا  دامنيت او همکارۍ د سازمان په کوربه توب د ٤٧ هېوادونو او نړيوالو اوسيمه يېزو سازمانونو په ګډون  د دوشنبې په ښار کې جوړ شوى و ، ګډون وکړ .
  د بهرنيو چارو وزارت مطبوعاتي دفتر باختراژانس ته خبرورکړ ؛  په دې کنفرانس کې  د تاجکستان جمهوريت جمهور ريېس امام علي رحمان د تروريزم پرخلاف د مبارزې په لاره کې د دغه هېواد د برياليو تجربو ، مبارزې او په نويمو کلونو کې په افغانستان کې  کورنيو ستونزو ته اشاراه وکړه  او په هغه وخت کې د نړيوالې ټولنې نه همکاري  او نه پاملرنه يې  دتروريزم د پراختيا سبب او د سپتمبر د يوولسمې نيټې  د پيښې  د رامنځته کېدو  يو دليل وباله .
  ده  تروريزم يوه سيمه يېزه او نړيواله ستونزه وبلله او ويې ويل چې دغه پديده  له هيڅ  ملت او دين سره  اړيکه نه لري .
رحمان له نړيوالې ټولنې څخه وغوښتل  چې په ګډه د دغه ناوړې پديدې  د مخنيوي لپاره  اقدام وکړي  او د هغه پرخلاف مبارزه  وکړي .
ده  د افغانستان په مشرۍ او مالکيت  د سولې د بهير ملاتړ وکړ او په دې برخه کې يې د خپل هېواد تيارى اعلام کړ .
  د هېواد د بهرنيو چارو وزارت سياسي معين د افغانستان د اسلامي جمهوريت په استازيتوب د يو هئيت په مشرۍ  دوشنبې ته تللى  دى.
ده په خپله وينا کې  د تروريزم د ودې او څرنګوالي عوامل بيان کړل او د دغې  پديدې  پراختيا يې د نړيوالې  همکارۍ او وفاق د سطحې ټيټوالى ، له يوشمېر دولتونو له خوا له دغې پديدي څخه افزاري استفاده او له مافيايي او جنايي شبکو سره د تروريستي شبکو نږدې  اړيکې  وبللې .
ده  د دغې پديدې د له منځه وړلو لپاره  د نړيوالې ټولنې د جدي همکارۍ  غوښتنه وکړه او په دې برخه کې يې د دولتونو په زيات  مسووليت منلو ټينګار وکړ .  ختم_ ج _ اکرم