کابل، د وږي ۲۶ مه، باختر
د جوزجان ولایت سیمه ییز مسوولین وايي چې د دغه ولایت په فیض آباد ولسوالۍ کې د نږدې ۲۴ میلیونه افغانیو په لګښت یوه ښوونځي ته ودانۍ جوړه او ګټې اخیستنې ته وسپارل شوه.
د باختر اژنس د خبر له مخې؛ د جوزجان ولايت د فيض آباد ولسوالۍ په كشکک کلي کې د یونیسیار دفتر له لوري د ۲۳ میلیونه، ۹۴۵ زره ۳۸۸ افغانیو په لګښت یوه ښوونځي ته ودانۍ جوړه او ګټې اخیستنې ته وسپارل شوه.
ورته مهال د یاد ښوونځي د پرانیستلو په مراسمو کې د کډوالو او بېرته راستنېدونکو چارو وزارت مسلکي معین مولوي عبدالرحمن راشد وویل چې د هېواد په ګوټ ګوټ کې د ښوونځيو او پراختیايي پروژو د پلي کولو چارې په چټکۍ سره روانې دي.
نوموړي وويل چې دغه ودانۍ ٨ درسي ټولګي، یو کمپیوټرلب، یو لابراتوار، ۴ اداري خونې، ۷ تشنابونه، ۴۵۰ متره احاطوي دېوال، د لمریزې برېښنا سيسټم، شنه ساحه، د ١٠ زره لېټرو په وړتیا د اوبو ذخیره، د زده کوونکو لپاره د لوبو ميدان او نور اړوند اسانتیاوې لري.
د کشکک کلي يو شمېر اوسېدونکي د دغه ښوونځي په جوړېدو د اسلامي امارت او همکارو بنسټونو څخه د مننې په ترڅ کې وايي، تر دې وړاندې يې ماشومان تر خيمو او يا هم په کرايي کورونو کې زده کړې کولې.
