جمهوررئیس غني د سلوانیا، برازیل ، مراکش ، نایجیریا او مکسیکو د نا استوګن سفیرانو باور لیکونه ومنل

کابل باختر د غويي دمياشتې ٦ نيټه :
د افغانستان داسلامي جمهوریت جمهوررئیس محمداشرف غني پرون  له غرمې وروسته د سلوانیا د نااستوګن سفیر ایګور جوکیک، د برازیل د نااستوګن سفیر کلودیو لینز، د مراکش د نااستوګن سفیر محمد کارموني، د نایجیریا د نااستوګن سفیر آشمیو ادیبایو او د مکسیکو  د نا  استوګن سفیر        جوزي الفانسو باورلیکونه په جلا جلا تشریفاتي مراسمو کې ومنل.
دجمهوررئيس دوياند دفتر باخترآژانس ته خبر ورکړ ،   د دغو سفیرانو د باورلیکونو د سپارلو په جلا جلا مراسمو کې چې د ارګ په ګلخانې ماڼۍ کې ترسره شول د بهرنیو چارو وزارت سیاسي معین حکمت خلیل  کرزي هم حضور درلود، جمهور رئیس غني او دغو سفیرانو د افغانستان او ددغو هېوادونو ترمنځ د اړیکو په لا پراختیا او د علاقې وړ  موضوعاتو په   سر       بحث او خبرې وکړې.
جمهوررئیس غني د سلوانیا، برازیل، مراکش، نایجیریا او مکسیکو نااستوګن سفیرانو ته د ښه راغلاست تر څنګ د افغانستان او د دغو هېوادونو ترمنځ د اړیکو په لا پراختیا ټینګار وکړ او نوموړو سفیرانو ته یې په نويو دندو کې د بریالیتوب هیله وکړه.
د دغو هېوادونو نااستوګن سفیرانو ژمنه وکړه چې په افغانستان کې به د خپل ماموریت پر مهال له افغانستان سره د خپلو هېوادونو د اړیکو په پراختیا کې لا ډېرې هڅې وکړي.
پاى ذکرالله