کابل باختر دکب دمياشتې ١٢ :
د افغانستان د اسلامي جمهوریت جمهوررئیس محمداشرف غني نن له غرمې مخکې د نفوسو د احوالو د ثبت قانون په شپږمه ماده کې د تعدیل په اړه تقنیني فرمان توشیح کړ.
دجمهوري رياست دوياند مطبوعاتي دفتر باخترآژانس ته خبر ورکړ :
د دغه فرمان په لومړۍ ماده کې راغلي: د اساسي قانون د ۷۹مادې له حکم سره سم د نفوسو د احوالو د ثبت قانون په شپږمې مادې کې تعدیل چې د افغانستان د اسلامي جمهوریت د ١٥/٦/۱۳۹۵ نیټې د ۱۳ګڼې مصوبې په اساس تصویب شوی دی، توشیح کوم.
جمهوررئیس له دغه فرمان سره سم، د عدلیې او په پارلماني چارو کې د دولت وزیران موظف کړل چې دغه فرمان د ۳۰ورځو په موده کې د ملي شورا د لومړنۍ غونډې تر جوړېدو دغې شورا ته وړاندې کړي.
همدارنګه دغه فرمان له توشیح سره سم نافذ دی او د کابینې له مصوبې او یاد تعدیل سره به رسمي جریده کې خپرېږي.
جمهوررئیس د دې فرمان له توشیح وروسته، وویل: د دغې مادې توشیح هر اړخیزه ده او کره شمېرو ته د نه لاسرسي ستونزه حلوي.
جمهوررئيس زیاته کړه: دا یوه جدي موضوع وه، چې د خدای (ج) په فضل سره په غوره توګه حل شوه، د تقنین کمېټې او د کابینې له ټولو غړو او درانه ملت څخه منندوی یم.
جمهوررئیس وویل: حکومتولي په زغم او ژور فکر کېږي، زموږ د حرکت طریقه اساسي وه او دا به نیک فال وګڼو او هیلهمند یوو چې د افغانستان پارلمان یې ژر تائید کړي.
جمهوررئیس په ډاګه کړه: موږ دوه بیړنۍ مسئلې لرو، له پاکستان او ایران څخه زموږ د خلکو راستنېدل چې د هویت کارتونو ته اړتیا لري او بل د ټاکنو کول دي. د ملي وحدت حکومت څرګنده او ټینګه اراده لري چې ټاکنې وشي اود ټاکنو په بهیر کې مو چې د تذکرو د استعمال کوم شرط درلود، هغه مو پوره کړ.
ورپسې د جمهوري ریاست دویم مرستیال محمدسرور دانش وویل، تذکره لرل د یو شخص ملي او مدني هویت ښيي او د افغانستان په اساسي قانون کې دغه هویت په تفصیل بیان شوی دی.
هغه په دې بهیر کې د جمهوررئیس او اجرائیه رئیس له ملاتړ څخه د مننې تر څنګ وویل، د الکترونيکي تذکرو په اړه د افغانستان د بېلابېلو قومونو غوښتنه دا وه چې د افغانستان د ملي هویت درې عنصره یعنې ملیت، دین او قوم دې په پاڼه کې درج شي.
اجرائیه رئیس ډاکټر عبدالله عبدالله هم په دې اړه خبرې وکړې، ويې ویل: د نفوسو د احوالو دثبت قانون شپږمه ماده کې تعدیل یولړبحثونه غوښتل او اکثریت په هغې طرحې قانع دي چې د تعدیل لپاره یې وړاندیز شوی و، دا یو ښه خبر ګڼي او هیله مند یوو چې عملي چارې یې هم چټکې شي.
