جاويد فيصل : د پاکستان صدراعظم د جمهور ريېس غني په بلنه کابل ته راځي

کابل  باختر د وري يوولسمه :
ټاکل شوې ده  د پاکستان صدراعظم  د جمهور  رييس غني په بلنه  د روان کال د وري  د مياشتې په اوولسمه نېټه  چې د اپريل د مياشتې له شپږمې نيټې سره  برابره ده  کابل ته سفر وکړي .
  د باختراژانس د خبر له مخې ،  د اجرايېه رياست د وياند مرستيال  جاويد فيصل  په يوه خبري غونډه کې وويل چې،د پاکستان له صدراعظم سره به  له تروريزم سره د مبارزې په لاره کې  د پاکستان  د ژمنو د اجرا کولو په باب  خبرې وشي .
  جاويد فيصل زياته کړه چې افغانستان تر اوسه پورې  د تروريستانو پرخلاف د پاکستان  اقدامات  نه دي ليدلي.
  ده دغه راز زياته کړه چې له تروريزم سره  په ملاتړ کې د پاکستان  د ستراتيژى چلند کې  هيڅ بدلون نه دى رامنځته شوى او پاکستان اوس هم  د تروريستي ډلو ملاتړ کوي .
هغه وويل چې له تروريستانوڅخه  د پاکستان ملاتړ ټولې نړى ته  معلوم دى  او اسلام اباد بايد  دخپل نړيوال حيثيت اوباور دښه والي په خاطر دتروريستانو له ملاتړ څخه لاس واخلي .
فيصل زياته کړه  د پاکستان  په چلند کې د نه بدلون په دليل  د افغانستان حکومت د دغه هېواد صدراعظم ته رسمي بلنه ورکړه چې افغانستان ته سفر وکړي  او دواړه  لوري  د اعتماد جوړولو او له تروريزم سره  د مبارزې د عملي ګامونو دپورته کولو په باب  ژمنه وکړي .  ختم_ ج _ اکرم