کابل، د وږي ۱۹مه، باختر
د اوبو او برېښنا وزارت په تخار ولایت کې د ۴ کانالونو د تحکیماتو او بیارغونې چارو د پیل کېدو خبر ورکړی دی.
یاد وزارت د یوې خبرپاڼې په خپرولو سره ویلي چې د تخار ولایت په مرکز تالقان او فرخار ولسوالۍ کې د شاه روان، ګاومالي، ملک های خطایان او لجده کانالونو د تحکیماتو او بیارغونې چارې ۳۸۴ زره امریکایي ډالرو په لګښت د تالقان د سیندیزې فرعي حوزې د رئيس سراج الدین وهاج، قومي مشرانو او د سیمې د اوسېدونکو په شتون کې پيل شوې.
د سرچینې د مالوماتو له مخې؛ په دغه پروژه کې ۱۵۰۰ متره تحکیمات او د څلورو دهنو ودانۍ شاملې دي، چې د (اف. اې. او) موسسې په مالي لګښت د تالقان د سیندیزې فرعي حوزې تر څارنې لاندې پلي کېږي.
په خبرپاڼه کې همدرانګه ویل شوي، چې د دغې پروژې چارې به د ۱۱ میاشتو په موده کې بشپړې او ګټې ته په سپارلو سره به یې ۱۱۰ زره جریبه ځمکه خړوبه شي.
