کابل، د لېندۍ ۲۶ مه، باختر
د بغلان د بدني روزنې او سپورټ آمریت د والیبال فدراسیون په همغږۍ د دوشي ولسوالۍ د کیله ګي د ځايي اوسېدونکو له لوري د ۲۸ لوبډلو ترمنځ د والیبال پیل شوې سیالۍ د نجیب حقیار لوبډلې په اتلولۍ پای ته ورسېدې.
د بغلان د بدني روزنې او سپورټ آمر قاري محمد امیر امیري وايي، چې دغه لوبې د دغه ولایت د مرکز او ولسوالیو د ۲۸ لوبډلو ترمنځ په حذفي سیسټم پیل شوې وې، چې موخه یې د لوبغاړو هڅول، د والیبال لوبې ته وده ورکول او دغه راز په ټولنه کې د سالمو رقابتونو دودول وو.
امیري زیاته کړه، چې د دې سیالیو پایلوبه د سمنټ غوري او نجیب حقیار د لوبډلو ترمنځ ترسره شوه، چې د نجیب حقیار ټیم وکولی شول د درې میدانونو په ګټلو سره سیمنټ غوري ټیم ته ماتې ورکړي او د دې سیالیو اتلولي په خپل نوم کړي.
د والیبال لوبغاړي وايي، چې دغه ډول لوبې د سالمو رقابتونو د دودولو او دغه راز د ورزش د ودې په برخه کې ډېرې ګټورې دي او اړتیا ده، چې په کلیوالي سیمو کې د سالمې تفریح په موخه لا زیاتې دغه ډول لوبې ترسره شي.
