ایټالیا به د افغانستان د بنسټونو د پیاوړتیا په برخه کې خپلو مرستو ته دوام ورکړي
کابل باختر دلړم ١٤مه
د ایټالیا صدراعظم ښاغلي ماریو مونتي د افغانستان د اسلامي جمهوریت له جمهور رئیس حامد کرزي سره په ارګ کې د یوه ګډ خبري کنفرانس په ترڅ کې وویل چې له ۲۰۱۴ کال وروسته به ایټالیا افغانستان یوازې پرې نه ږدي او د دواړو هېوادونو تر منځ د لاسلیک شوي سند په چوکاټ کې به له افغانستان سره خپلو مرستو ته دوام ورکړي.
دجمهوري رياست مطبوعاتي دفتر باختر اژانس ته خبرورکړ
ماریو مونتي په افغانستان کې د ایټالیا د راتلونکې ماموریت په اړه وویل: له ۲۰۱۴ کال وروسته به لکه د نورو هېوادونو په څېر په افغانستان کې د ایټالیا ماموریت هم بدل شي ، خو د افغانستان د بنسټونو د پیاوړتیا او په اقتصادي برخه کې به ددغه هېواد مرستې دوام ومومي.
د ایټالیا صدراعظم په افغانستان کې د جمهوري ریاست د راتلونکو انتخاباتو په اړه وویل چې دا انتخابات به د افغانستان د خلکو په ژوند کې یوه داسې نوې پاڼه پرانیزي، چې هغه ته به ستاسو د پرمختګونو د دوام په سترګه کتل کېږي.
ماریو مونتي په افغانستان کې یو شمېر ستونزو ته د اشارې په ترڅ کې وویل: په افغانستان کې ستونزې شته، خو ډاډمن یو چې د نړیوالې ټولنې په مرسته به له منځه لاړې شي.
ده زیاته کړه: موږ دا همکارۍ دداسې هڅې په توګه تر سره کوو چې دا سیمه او په خاصه توګه افغانستان په یوه داسې هېواد بدل شی چې په سیمه او نړۍ کې د سولې د ټینګولو په برخه کې ونډه واخلي او په لازیاتو ټولنیزو او اقتصادي پرمختګونو برلاسی شي.
د افغانستان د اسلامي جمهوریت جمهور رئیس د ایټالیا صدراعظم ښاغلي ماریو مونتي ته د ښه راغلاست دویلو تر څنګ په تېرو لسو کلونو کې د ایټالیا د مرستو له امله مننه او قدرداني وکړه.
د هېواد جمهور رئیس په افغانستان کې د ایټالیا د خدمت په اړه وویل: په تېرو لسو کلونو کې د ایټالیا خلکو له افغانستان سره تر ۵۰۰ میلیون ډالرو زیاته مرسته کړې ده. د ایټالیا خلک د زړه له اخلاصه د افغانستان د خلکو په خدمت کې وو.
حامد کرزي وویل چې موږ ددوی د لس کلنو همکاریو او تر یوې پېړۍ زیات له دوی سره زموږ د دوستۍ له امله مننه کوو.
د هېواد جمهور رئیس زیاته کړه، د ایټالیا صدراعظم زموږ په څېر ډاډ لری چې افغانستان به د خپل توان پر مټ پر مخ لاړ شي او خپل پرمختګونه به وساتي.
حامد کرزي د انتخاباتي شکایتونو د اورېدو په کمیسیون کې د دوو بهرنیو غړو د شتون په اړه د یوې پوښتنې په ځواب کې وویل: افغانستان د ملي حاکمني او اساسي قانون خاوند دی، د نړۍ په هېڅ هېواد کې چې ملي حاکمني او آزادي لري، په داخلي، انتخاباتي او دولتي نهادونو کې یې بهرني کسان حضور نلري.
ده زیاته کړه: افغانستان باید په خپله د نورو هېوادونو په څېر خپلې سیاسي، اجتماعي او اقتصادي چارې او دغه راز انتخابات تر سره کړي او بهرنیانو ته پدې برخه کې اړتیا نشته.
