امريکا ددغه هيواد د مرستې ٨٥٠ مليونه ډالره د افغانستان په ملي بودجه کې شاملوي

کابل- باختر دمرغومي څليرويشتمه:
  امريکا د ٢٠١٣ ميلادي کال تر مارچ پورې ٨٥٠ مليونه ډالره د افغانستان ملي بودجې ته ليږدوي .
دجمهوري رياست ويندوى ايمل فيضي چې امريکا ته د افغانستان د جمهور رييس حامدکرزي د سفر د نتيجو په باب دباختر اژانس  له خبريال سره خبرې کولې،  د دغه ټکى په څرګندولو سره  زياته کړه:  دغه پيسې به د بريښنا ، کرنې او کانونو په برخوکې  وکارول شي .
د فيضي د څرګندونو له مخې: په دغه سفر کې دغه راز موافقه وشوه چې امريکا  خپلې مرستې دبنسټونو په  جوړولوکې د افغانستان د دولت دلومړيتوبونو له مخې ترسره کوي .
دجمهور رييس ويندوى دغه راز وويل: د امريکا دولت ژمنه وکړه چې دکجکي د بند پاتې لګښتونه به  ورکړي او د افغانستان په بودجه کې به  شامل کړي .
  دده دڅرګندونوله مخې:  له دغې مرستې سره په استفادې سره به  دکجکي بند بيا جوړ شي .
  دغه راز د افغانستان د لورې په وړانديز، امريکا د اقتصادي بنسټونو په بيا جوړولو، د سالنګ او د مرکزي سيمو د لويو لارو، د جلال اباد _ تورخم ، قندهار _ چمن  او دکوکچې اوکونړ د بندونو په جوړولو، د شبرغان د ګازو د را ايستلو، د کرنې د ودې او پراختيا او د هيواد په ولايتونوکې د امريکايي پوهنتونونو دڅانګو په جوړولوکې له افغانستان سره مرسته کوي .